Dje është publikuar edhe në youtube kënga zyrtare e Kupës së Botës Rusia 2018, e cila do të interpretohet nga këngëtarja nga Kosova Era Istrefi në një duet me Will Smith dhe Nicky Jam.
Kënga që do të interpretohet në ceremoninë hapëse të turneut, e prodhuar nga producenti amerikan Diplo, bëri bujë me t’u publikuar.
Këngën ‘Live it up’ e ka publikuar edhe Will Smith në profilin e tij në rrjetin social “Facebook”, ku ka më shumë se 78 milionë ndjekës.
Në publikimin e bërë dje, ai promovoi Era Istrefin e Kosovën, si vendi prej nga vjen ajo.
“Sapo kemi publikuar këngën zyrtare për “Kupën Botërore, Russia 2018! Le të valojnë flamujt e juaj në komente, dëshiroj t’i shoh!”, shkruante Smithi në mbishkrimin e videos që publikoi në Facebook.
Pas emrit të Era Istrefit, ishte flamuri i Kosovës.
Por, sot flamurin e Kosovës ai e ka zëvendësuar me flamurin e Shqipërisë.
Pjesëmarrja e Era Istrefit në këngën zyrtare të Kupës së Botës nxiti reagime pozitive ndër shqiptarë, të cilët po ndiheshin krenarë me përfaqësimin e Erës.