Në Kazermën “Adem Jashari” në Prishtinë u mbajt një koncert i përbashkët i Orkestrës Muzikore të Forcave të Armatosura të Turqisë në bashkëpunim me Orkestrën e Forcës së Sigurisë së Kosovës (FSK).
Për të dëgjuar programin e dy orkestrave të pranishëm ishin zëvendës komandanti i Komandës së Forcave Tokësore ( KFT), gjeneral brigade Gëzim Hazrolli, zëvendës komandanti i Brigadës së Mbështetjes Operacionale (BMO), kolonel Avdi Rraci, shefi i Operativës së KFT –së, kolonel Bashkim Shillova, komandanti i Kontingjentit Turk në Kosovë, kolonel Mustafa Tavazar, si dhe oficerë dhe nën oficerë të FSK-së dhe Ushtrisë së Turqisë.
Gjeneral Hazrolli falënderoi Orkestrën e Ushtrisë turke për këtë iniciative dhe bashkëpunim, dhe shtoi se në kuadër të ndërtimit të kapaciteteve operacionale një ndër kapacitetet shumë të rëndësishme është edhe Bendi Muzikor.
I kënaqur nga realizimi i këtij bashkëpunimi u shpreh edhe komandanti i kontingjentit ushtarak turk në Kosovë, kolonel Mustafa Tavazar, i cili tha se FSK-ja ka një bend të mrekullueshëm.
Ndryshe, gjatë këtij koncerti të pranishmit patën mundësi që të argëtohen dhe të shijojnë interpretimin e veprave të mrekullueshme nga këto dy orkestra, me ç’rast Orkestra turke befasoi publikun me interpretimin e dy këngëve shqipe, të cilat u pritën mjaft mirë nga të pranishmit.