Ju ktheu në tokën e të parëve dashuria për baltën dhe mjaltën e at-mëmëdheut të poetëve rilindas.
Midis kimisë dhe fizikës së raportit të varshmërisë emotive që vetëm mërgimtarët e kuptojnë si sprovë të mbijetesës në parabolēn e integrimeve me tokat që i lagë Atlantiku, nuk ka fuqi që e shkëput rrënjën e largët në Kosovën e miteve, legjendave dhe njerëzve normalë.
Ju erdhët me bindje dhe ftesa më e madhe është zëri i kërkesës për ndryshime dhe mirësi.
Ndoshta atje jeni mësuar përditshmërisht vetëm me punë të pavarur, me iniciativë, me dinjitet dhe identitet profesional. E këtu politika si art i të mundshmes është labirint i padukshëm ku vlera e qytetarit nuk është vetëm ecja mbi shtegun e votës por edhe hapërimi në paserelën e sponzorëve dhe financuesve të fushatave zgjedhore si hisedarë të heshtur të kombinimeve dhe fitoreve elektorale që i shohim të festohen me primitivizëm folklorik në sheshin e Prishtinës.
Juve së paku gjithsesi duhet t’ua njohin meritën e punës dhe suksesit dhe ndoshta do ta kthjelloni pak qiellin e zymtë të kuazi-analistave proto-ideologjikë që paturpësisht në ikje nga kompleksi i inferioritetit lokalist shajnë diasporën për shkak të patriotizmit dhe lojalitetit të dëshmuar edhe me sakrificë ndaj Republikës dhe ligjeve të saj.
Zotërnj të nderuar, Mister Rama dhe Mister Latifi , ishalla iu lënë të punoni të qetë e të lirë duke iu konsideruar si “të jashtëm”. Sepse tonin nuk e kanë llogaritur asnjëherë edhe sikur të jetë profet!
Ishalla nuk iu vendosin pengesa, bërryla e ndërskamca e nuk iu lëshojnë fantazmat e propagandave të portaleve pa adresë se koha e dashurisë politike është e vështirë sidomos kur dashuria është interes i përveçëm (ose edhe total).
Për hajr na qoftë e ardhmja me ju që mund të kishte ndodhur edhe dje.
