Qeveria e Kosovës, përkatësisht ministria e FSK-së, ministria e Integrimeve dhe ajo e Financave i kanë dhënë dritën jeshile projektligjit për FSK-në të sponsorizuar nga presidenca.
Këto tri ministri tashmë i kanë dhënë opinionet e tyre të cilat në fakt i japin mbështetje rritjes se kompetencave për FSK-në.
I kontaktuar nga ‘Indeksonline’, Bajram Gecaj këshilltar i kryeministrit Mustafa ka treguar se tashmë kjo çështje nuk kalon përmes vendimeve politike të Qeverisë, por i takon sekretariatit të Ekzekutivit se kur do ta procedoj për Kuvend projektligjin në fjalë.
“Nëse tri ministritë përkatëse i kanë dhënë opinionet e tyre pozitive për FSK-në, atëherë është çështje e sekretariatit kur e procedon në Kuvend. Ata kanë afat një muaj me dorëzu në Kuvend, pra është çështje e tyre nuk ka të bëjë fare me neve”, ka thënë Gecaj.
Një ditë më parë, ministria e Integrimeve, ka thënë se projektligji për FSK-në nuk i cenon parimet e së drejtës se BE-së.
Edhe ministria e Financave ka konfirmuar për mediet se projektligji në fjalë nuk implikon buxhet shtesë.
Projektligji për FSK-në përkundër kundërshtimeve të NATO-s dhe ambasadës se SHBA-ve në Prishtinë është përkrahur nga i gjithë spektri politikë në vend.
Për miratimin e këtij projektligji nuk nevojiten më shumë se 61 vota.