Shkrimi i gjatë i kryeparlamentarit dhe njëkohësisht shefit të PDK-së, Kadri Veseli, rreth pozicionimit të tij karshi Gjykatës Speciale, sipas analistëve politikë është “zbutje” karshi politikës së SHBA-së.
Jeton Kelmendi analist politik, ka thënë për “Bota sot” se letra e Veselit është taktikë e tij dhe kjo dëshmon se tek ata kur “kollitet” Amerika natyrisht se dorëzohen.
Kelmendi ka pohuar se iniciativa për shfuqizimin e Gjykatës Speciale nuk do të realizohej, sepse kishte seriozitet të SHBA-së dhe vendeve të QUNT-it për këtë çështje.
“Mendoj se taktika e kryeparlamentarit Kadri Veseli apo zbutja e tij dëshmon se tek këta kollitet Amerika dhe natyrisht se duhet të dorëzohen karshi politikës në raport me SHBA-në. Asnjëherë nuk kam menduar se do të shfuqizohet për faktin që e kishte me seriozitet SHBA-ja dhe vendet e QUINTI-it, pra kjo është një taktikë e Veselit për të thënë se këta po duan dhe unë jo, si dhe për ta ngritur rolin e atij që nuk lejon të bëhet keq. Sigurisht që do të ketë tentativa, por kjo është një gjë me dy pamje, në njërën që është përkrahë Amerikës ( në fakt qëndron prapa iniciativës), kinse unë nuk jam për këtë shfuqizim, në anën tjetër edhe tek faktori i brendshëm sheh që nuk mund ta bëjë”, ka theksuar Kelmendi.
Në anën tjetër, disa deputetë të cilët kanë dhënë nënshkrimin për shfuqizimin e Gjykatës Speciale, kanë mirëpritur pozicionimin e kryetarit të tyre, duke shprehur edhe gatitshmëri për t’i tërhequr nënshkrimet në rast se u kërkohet nga partia.
Deputeti i PDK-së, Mërgim Lushtaku, thotë se qëndrimi i tij do të jetë në përputhje me qëndrimet partiake.
“Inciuesi është Nait Hasani dhe më mirë do të ishte të konsultoheni me të. Por unë do të respektoj vendimin e partisë, unë se kam problem”, ka thënë ai në një prononcim për mediat vendore.
“Bota sot” ka kontaktuar edhe iniciuesin për shfuqizimin e Gjykatës Speciale, Nait Hasanin, mirëpo ai nuk ka dashur të prononcohet.
Ndërsa, në deklaratat e mëhershme Hasani ishte shprehur se nuk do të tërhiqen dhe se ky ligj duhet të shfuqizohet pasi që nuk është në të mirë të luftës së UÇK-së.