Analisti Blerim Burjani është shprehur kritik ndaj presidentit të vendit, Hashim Thaçi.
Në një prononcim për “Bota sot”, Burjani thotë se i pari i shtetit është një politikan, i cili e konsideron veten hero i luftës dhe i paqes.
“Statuti i Asociacionit është problematik dhe këtë e ka bërë Hashimi pa e ditur se çka po bënë dhe çka mund të gjejë Kosovën si shtet. Është mjaft problem me këtë president, i cili e ndien veten hero i paqes dhe i luftës, i shtetndërtimit e gjithçka”, thotë Burjani për “Bota sot”.
Sipas tij, Thaçi deri më tani e shtyrë Kosovën drejt dizentegrimit duke nënshkruar fusnotën dhe marrëveshjet e tjera të dëmshme për vendin.
Sa i përket kërkesës së ministrit të Administratës Lokale në dorëheqje, Ivan Tododsijevic, i cili ka thënë se ligjet e Kosovës duhet t’i përshtaten Asociacionit të komunave serbe, Burjani e quan këtë qesharake.
“Kjo deklaratë është qesharake dhe e pakuptimtë, sepse Asociacioni s’mund të jetë kurrfarë mekanizmi kushtetues e as ligjor. Ai duhet të jetë pjesë e sistemit ligjor të Kosovës, e jo të ketë kompetenca antikushtetuese dhe antiligjore”, shtoi Burjani.