“Është e papranueshme me tërheq zvarre një zonje sepse në fakt vetë paraqitja e saj ka qenë një dështimi i protokollit. Mirëpo, kryeministri në atë mënyrë nuk ka qenë dashur të bie në atë nivel dhe ta tërheq, pa marre parasysh arsyetimet që ka dhënë, ai ka qenë nën çdo nivel të detyrës” ka thënë Arberie Nagavci, deputete e Lëvizjes Vetëvendosje.
Po i bënë gati 1 vit që është në krye të qeverisë, por paraqitjet e Kryeministrit Ramush Haraidaj në opinion gjithnjë e më shumë po bëhen më të çuditshme dhe më të papara më herët për publikun.
Më tre nëntor të vitit 2017, Kryeministri i Kosovës Ramush Haradinaj, është përballur me situatë jo të këndshme kur ka dal para familjarëve të grupit të “Kumanovës” të cilët po protestonin kundër dënimit të tyre. “E ti që po bërtet, mshele”, i tha njërit që fliste me megafon.
Pas kësaj, ka pasur edhe të tjera sjellje të “pahijshme” të Kryeministrit Haradinaj.
E kulmin kryeministri i Kosovës, e arriti në përvjetorin e Lidhjes Shqiptare të Prizrenit.
Derisa një grua e prezantuar me emrin Valdete Derralla, pasardhëse e gjeneralit Mehmet Derrala e mori fjalën në ceremoninë zyrtare, aty doli kryeministri Haradinaj ku edhe e tërhoqi me forcë nga foltorja.
Teksa po u drejtohej të pranishmëve, zonja që tha se është pasardhëse e gjeneralit Mehmet Deralla, të cilit, sipas saj, iu besua posti i ministrit të Luftës në Qeverinë e Ismail Qemalit, i vetmi nga trojet që kanë mbetur jashtë Shqipërisë londineze, i është afruar kryeministri Haradinaj, duke e kapur për dore dhe duke e tërhequr për ta larguar.
Më pas ka shpërthyer një fjalosje mes zonjës dhe kryeministrit të Kosovës, i cili e shtynte atë për ta larguar nga foltorja.
Tek pas këtij momenti, ka ndërhyrë edhe truprojat e kryeministrit dhe persona të tjerë për ta larguar zonjën.
Mirëpo, sa është e hijshme kjo sjellje e përsëritshme e kryeministrit të Kosovës, vendi i cilit synon që mos ta promovojë dhunën dhe synon anëtarësimin në organizata evropiane, flasin sociologë, deputetë dhe analistë.
Haradianaj, i pa kulturuar dhe pa edukatë
Deputetja e Lëvizës Vetëvendosje, Arberie Nagvaci, në një prononcim për “Bota sot” ka thënë se veprimet e kryeministrit tregojnë mendësinë dhe mënyrën se si e shikon vendin dhe si duhet vepruar në këtë vend.
“Organizimi për manifestimi e përvjetorit të Lidhjes së Prizrenit ka qenë një dështim i plotë i institucioneve të vendit në një ngjarje kaq të rëndësishëm ka dështuar komplet protokolli dhe aq më tepër veprimi i kryeministrit Haradinaj, përjashton krejt normat kryesore bazike të etikes dhe të sjelljes së një kryeministri. Është e papranueshme me tërheq zvarre një zonje sepse në fakt vetë paraqitja e saj ka qenë një dështimi i protokollit. Mirëpo, kryeministri në atë mënyrë nuk ka qenë dashur të bie në atë nivel dhe ta tërheq, pa marre parasysh arsyetimet që ka dhënë, ai ka qenë nën çdo nivel të detyrës” ka thënë Nagavci.
Tutje, deputetja e VV-se komentoi edhe deklaratën e kryeministrit, ku ky i fundit ishte deklaruar se po të ishte ndonjë burrë në vend të Valdete Deralles, do të vepronte ndryshe.
“Ky është gabimi i rrallës në vend se ai te dilte në konferencë për media të kërkonte falje për sjelljen e dhunshme, sjellje të pa kulturuar dhe pa edukatë, në vend të kërkonte falje për çdo qytetarë të Republikës ku në detyrën e kryeministrit ai ka bërë një veprim të tillë ai vazhdon me deklarata të cilat tregojnë mendësinë dhe mënyrën se si e shikon vendin dhe si duhet vepruar në këtë vend” ka përfunduar deputetja e VV-së, Arberie Nagavci.
Përgjegjës Protokolli
Sociologu Bekim Selishta, në një prononcim për “Bota sot” ka thënë se përgjegjësia ndaj atyre veprimeve i takon protokollit, aty vendoset nëse është vepruar drejtë apo jo.
“Fjalimet përgatiten me protokoll, në protokoll ka rregulla dhe aty vendoset kush do të jetë pjese e organizmit, përgjegjësi jep vetëm pjesa e protokollit, madje aty vendoset nëse kanë vepruar drejte institucionet shtetërore, apo duhet penalizuar për një veprim të tillë. Unë në fund të fundit i shoh shumë fajtore edhe shoqatat që merren me të drejtat e grave, a merren ato vetëm me privilegje apo edhe me gjëra tjera si kjo e fundit, reagimi i tyre nuk ka qenë si është dashur të jetë, nuk duhet mbështetur një femër veç kur ka privilegje por duhet reagoj një femër edhe në aspektet tjera” ka përfunduar Selishta.
Haradinaj përbën një fatkeqësi për Kosovën
Analisti politik Nexhat Haziri, në një prononcim për “Bota sot” ka thënë se ky njeri që është kryeministër i vendit, sikur harron se nuk është më rojtar apo punëtor sigurimi në salla koncertesh por është kryeministër, andaj duhet të jetë shumë i kujdesshëm për veprimet e tij.
“Veprimet e kryeministrit Haradinaj gjatë gjithë kohës sa është drejtues i qeverisë së Kosovës, siç është edhe ai veprimi skandaloz në Prizren, për mua nuk bëjnë ndonjë risi apo të papritur, pasi ai nuk mund të dal nga vetja, pra I tillë është dhe kjo përbën një fatkeqësi për Kosovën që ky njeri është kryeministër i vendit. Z. Hardinaj sikur harron se nuk është më rojtar apo punëtor sigurimi në salla koncertesh por është kryeministër, andaj duhet të jetë shumë i kujdesshëm për veprimet e tij. Megjithatë unë them mendimin tim, se sjellja dhe veprimet e tij reflektojnë nga personaliteti i tij dhe kjo nuk përbën asnjë të papritur për mua por edhe për shumicën e qytetarëve të Kosovës” ka përfunduara Haziri.
