Presidenti i Kosovës, Hashim Thaçi në televizionin publik ka përmendur se në kohën e Titos dhe të Rankoviqit Kosova ka marrë si “dhuratë” një sipërfaqe territorit në veri të vendit nga Serbia.
Lidhur me deklaratën e Thaçit, deputetja e Kuvendit të Kosovës nga radhët e Vetëvendosjes, Drita Millaku në një prononcim për “Bota sot” tregon hilen e presidentit lidhur me këtë temë dhe se e quan atë të rrezikshëm.
“Kjo deklaratë tregon naivitetin e skajshëm dhe bashkë me të edhe hilen e presidentit për këtë temë. Ne duhet të jemi sy qelë sepse sipas kësaj logjike edhe kushtetuta e 1974-ës është e kohës se Titos dhe nuk duhet pranuar. Pra kemi të bëjmë me një njeri që e ka humbur toruan dhe arsyen e shëndoshë e qe është rrezik për ne”, është shprehur Millaku për “Bota sot”.
Për më tepër, ajo i ka rikujtuar Thaçit, se në kohën e Rankoviqit kanë ndodhur persekutimet dhe shpërnguljet më të mëdha të popullatës shqiptar, si dhe e ka krahasuar me të edhe kohën e qeverisë në 10 vjeteshin e fundit në vend.
“Dhe dua ti kujtoj Thaçit se në kohën e Rankoviqit kanë ndodhe represaljet, persekutimet dhe shpërnguljet më të mëdha të popullatës shqiptar pra edhe në 10 vjeteshin e fundit të qeverisjes së Thaçit janë persekutimet dhe shpërnguljet më të mëdha të shqiptareve pra Rankoviqi dhe Thaçi kanë një praktik të njëjtë sa i përket shqiptareve”, ka potencuar deputetja e VV-së për “Bota sot”.
Ajo ka shtuar populli e ka kuptuar se kush është Hashim Thaçi, por është në pritje të shpërthimit.
“Diletantizmi politik i skajshëm i presidentit Thaçi tregohet më së miri me këtë pohim të tijin. Ky njeri mendon se populli i Kosovës është akoma i pashkolluar dhe i painformuar por e ka gabim sepse populli e ka kuptuar kush është Hashim Thaçi, por është në pritje të shpërthimit”, ka përfunduar Millaku për “Bota sot”.
