Çfarë e shkaktoi vërshimin në rajonin e Shkupit?

Shkupi

Çfarë e shkaktoi vërshimin në rajonin e Shkupit?

Më: 19 gusht 2016 Në ora: 09:18
Vërshimet në Maqedoni

Prerja masive e malit sipas profesorit universitar Aleksandar Trendafilov është një ndër arsyet kryesore për numrin e madh të viktimave gjatë vërshimeve të 6 gushtit.

Përveç degradimit të malit, mungesa e kanalizimit dhe sistemit për evakuim, besohet se janë dy faktorët tjerë që shkaktuan tragjedinë në njerëz në Shkup dhe rrethinë.

Trendafilov nënvizon se edhe në rajon kishte shi edhe më të shumë se në Shkup, por viktima pati pak.

Ai mori si shembull vërshimet e vitit 1986 në Negotinë. Këtu thotë se infrastruktura e kaloi provimin.

“Në vitin 1986 ndodhi vërshim në epiqendrën e Negotinës. Atje po kultivohet vreshta, toka nuk është e përgatitur ta pranojë ujin dhe ishte moti i ligë më i keq se ai i këtushmi. Megjithatë nuk pati në njerëz. pse? Sepse Negotina ka rregullim, ka shtrat të dimensionuar për 100 vjet. Shtrati nuk mundej ta pranojë ujin. Sasia e ujit ishte më e madhe në krahasim me ato që mund t’i pranojë, andaj rrugët nga të gjitha anët u shndërruan në shtrat . Dëmet ishin shumë të mëdha. Shtëpi, vetura, kamion, traktorë i morri Vardari, por nuk pati viktima në njerëz. Përse ? Sepse pati sistem të evakuimit”, u shpreh për Tv21, Aleksandar Trendafilov, Profesor Universitar.

Profesori Trendafilov thotë se në katastrofën që kaploi Stajkovcin dhe Hasanbegun, faj ka edhe qarkorja, e cila sipas tij ka shërbyer si pendë dhe ka krijuar presion edhe më të fortë të ujit.

“E para kemi mal të shpyllëzuar, e dyta kemi transitin, një barrierë, një pendë. Kemi një presion të fortë, sepse ujërat nuk kanë ku të shkojnë, dhe nëse nuk do të ishte qarkorja e cila ishte si një lloje pende, ndoshta nuk do të kishim aq viktima. Njerëzit do të shpëtonin, do të shihnin se si vjen vala. Këtu çfarë ndodhi. Formohet një liqen, dhe papritmas drejt Stajkovcës niset vala e vërshimit me një lartësi të madhe, dhe kjo është arsyeja për numrin e madh të viktimave”, shtoi ai.

Kryetari i Qytetit të Shkupit, Koce Trajanovski tha sot se nuk është ekspert dhe nuk mund të thotë se a është gabuar diku në procesin e ndërtimit të qarkores.

Por kryetari i komunës së Gazi Babës, foli pa hezitim. Ai tha se pasi është ndërtuar qarkorja, është ndërhyrë prapë, dhe u krijua një liqen artificial me qëllim që të akumulohen ujërat nga malet.

“Agjencia e cila menaxhon me rrugët e Maqedonisë, ka bërë një mini-liqen të themi ashtu, e cila ndodhet në qarkoren në Stajkovcë. Aty ka një kanal i cili e pranon ujin i cili vjen nga malet, shkon ndër magjistralen, dhe me anë të një kanali të betonuar shkon në atë mini-liqenin. Por këtë sasi të ujit nuk mundi ta pranoj”, tha Toni Trajkovski, Kryetar i Gazi Babës.

Edhe inxhinieri i trafikut, Gjorgji Todorov, thotë se kanalizimi atmosferik në autostradë duhej të kishte kapacitet më të madh.

“Ishte lëshim i madh që poshtë autostradës nuk u ndërtua kanalizim atmosferik me kapacitet më të madh. Mbaj mend që kjo u propozua nga Fakulteti ndërtimor, por megjithatë nuk u bë. Pajtohem me kolegun se jemi vend i varfër dhe duam që të kalojmë më lirë. Por i varfëri paguan dy herë”, tha Gjorgji Todorov, Inxhinier Trafiku.

Besohet se në magjistralen Shkup- Kumanovë, tek qarkorja në Stajkovcë pësuan më së shumti civilët nga vërshimet e 6 gushtit.

Profesori universitar, Aleksandar Trendafilov thotë se alarmi është i ndezur moti për vërshimet në Shkup, shkaku i pozitës së keqe gjeografike që ka qyteti.

Ai shton se shumica e shtretërve të lumenjve janë shndërruar në deponi, dhe nuk pastrohen.

I tillë është rasti edhe me lumin Serava.

Kanali i këtij lumi është i ndërtuar që të evitohen vërshimet si ato në Hasanbeg.

Serava akumulon ujërat e tre lumenjve që burojnë nga Mali i Zi i Shkupit, kurse natën e vërshimet ishte i stërmbushur me ujë, por fatmirësisht nuk doli nga shtrati.

Uji i të tre lumenjve përmes kanalit përfundon në Vardar.

Kanali sot shihej se s’është i pastruar dhe është i mbushur me mbeturina.

Një kanal mbrojtës si ai i Seravës mungon përmbi fshatrat e Stajkovcës, Creshovës, Straçincës dhe Rashtakut, dhe kjo llogaritet edhe një ndër shkaqet që shkaktuan dëme aq të mëdha gjatë vërshimeve.

Sot mund të lexoni Shfletoni kopertinat