Korrigjimi i gabimeve në tabelat rrugore në Shkup do të fillojë pas muajit mars

Shkupi

Korrigjimi i gabimeve në tabelat rrugore në Shkup do të fillojë pas muajit mars

Më: 11 janar 2018 Në ora: 00:25
Tabelat rrugore në Shkup

Gabimet drejtshkrimore në tabelat e komunikacionit në Qytetin e Shkupit të cilat i detektoi Alsat-M, do të fillojnë të korrigjohen pas muajit mars. Kështu thotë drejtori i Ndërmarrjes Publike “Rrugët” të Qytetit të Shkupit Senad Smajllagiç, i cili ka punësuar një përkthyes me çka do të sigurohet se më nuk do të përsëriten gabime të tilla. Smajllagiç thotë se këta probleme i ka trashëguar dhe se do mundohet që të t’i sanojë të gjitha që janë nën kompetenca të ndërmarrjes që drejton.

“Ne kemi nënshkruar një marrëveshje për përkthim simultan prej maqedonishtes në shqip. Ja kjo që po e mbaj në duar është marrëveshja dhe e njëjta është në fuqi. Kështu që ne në të ardhmen do të kemi organ përgjegjës i cili do të mbajë përgjegjësi për përkthimet nga maqedonishtja në shqip. Nga muaji mars fillon sezoni pranverorë siç janë lyerja e rrugëve dhe vendosja e shenjave të reja duke i zëvendësuar ata që janë të thyera dhe ata që duhet të përmirësohen”, deklaroi Senad Smajllagiç, Drejtor i NP “Rrugët” – Qyteti Shkup.

Drejtori Smajllagiç shpjegon se vetëm në rrugët kryesore të Qytetit të Shkupit është e paraparë që tabelat sinjalizuese të jenë në dygjuhësore. Ata dytësore, do të varen nga përkatësitë etnike që përbëjnë komunën ku jetojnë. Pra secila përkatësi etnike që përbën së paku 20% të ndonjë komunës, gëzon të drejtën që shenjat sinjalizuese të trafikut të jenë të shtypura në gjuhën Maqedonase dhe gjuhën e tyre.

“Për dygjuhësi, në territorin e Qytetit të Shkupit janë vetëm tabelat në rrugët kryesore. Ndërsa rrugët dytësore janë nën kompetenca të komunave. Ja për shembull në Komunën e Çairit ka tabela edhe në shqip sepse vlen rregullativa e 20% të dygjuhësisë ndërsa në Komunën Qendër nuk është. Kjo shkakton konfuzion”, tha Senad Smajllagiç, Drejtor i NP “Rrugët” – Shkup.

Problemi me gabimet drejtshkrimore nëpër udhërrëfyes daton që nga fillimi i përdorimit të gjuhës shqipe në shenjat e komunikacionit. Problem në vete është edhe diskriminimi që bëhet duke fshirë vetëm mbishkrimet në gjuhën shqipe nëpër udhërrëfyesit që gjenden brenda dhe jashtë Qytetit të Shkupit.

commentFirst article
Sot mund të lexoni Shfletoni kopertinat