Kryeministri i Shqipërisë, Edi Rama, ka reaguar dhe një herë në lidhje me protestat e ditëve të fundit që pasuan vrasjen e 25-vjeçarit Klodian Rasha nga ana e policisë së shtetit.
Kreu i qeverisë ka thënë se protesta është një e drejtë e padiskutueshme dhe se nëse nuk do të kishte qenë kryeministër do të kishte marrë dhe ai pjesë në protestë për të shprehur indinjatën, por jo në mënyrë të dhunshme.
”Edhe unë po të mos kisha qenë kryeministër do kisha dalë në protestë. Por, jo për t’iu hedhur në fyt policëve dhe për të kapur kanatet e ministrisë së Brendshme, por për të dëshmuar indinjatë qytetarisht, si dhe vendosmërinë qytetare për të kërkuar drejtësi. Mos harroni thelbin se që në momentin e parë është mbajtur qëndrimi më korrekt”, ka thënë Rama, transmeton rrjeti televiziv A2.
“E drejta e protestës është e padiskutueshme, e paanashkalueshme, por kjo nuk do të thotë që protestuesit kanë gjithmonë të drejtë. Dhe këtu ndahen qeveritë demokratike dhe ato jo demokratike. Si mund të vihet në diskutim që nga rruga, jo këta, por sikur të ishin 500 mijë veta, pas kësaj të kërkojnë të iki dhe Drejtori i Policisë. Nuk vendoset në rrugë, por në bazë të asaj që është e drejtë. Ishte e drejtë që qeveria të kërkonte ndjesë, jo se kishte gisht, por se djalin e vrau arma e shtetit“, ka shtuar ai.
Sipas tij, dorëheqja e Sandër Lleshajt nga detyra e ministrit të Brendshëm ka qenë akt moral dhe jo për shkak të protestës.
“Ishte e drejtë që ministri i Brendshëm të këmbëngulte që duhej të largohej, jo se kishte përgjegjësi, as direkte as indirekte, por sepse ishte e drejtë që mesazhi i pjesëmarrjes në dhimbje e asaj familje mos të ishte vetëm me fjalë dhe që moralisht ministri i Brendshëm të thoshte atë që tha. Këto nuk janë bërë si rezultat i protestës“, ka thënë ai.
