Katër anëtarët e familjes Gjoka që mbetën të plagosur nga shpërthimi i bombolës së gazit në Velipojë janë nisur për në Itali për të vijuar kurimin.
Nëna me tre fëmijët pësuan djegie nga shpërthimi i zjarrit në hotel dhe dërgimi për në Itali u pa i domosdoshëm për shkak të gjendjes së rënduar.
Shpërthimi i gazit nga bombolat shkrumboi hotelin e familjes Gjoka në Velipojë, duke plagosur katër pjesëtarë të familjes dhe gjendja shëndetësore e tyre vijon të jetë tejet kritike.
Nga ngjarja e rëndë pësuan djegie të shumta në trup shtetaset: Alketa Gjoka, 40 vjeçe; Daniela Gjoka, 19 vjeçe; Klarisa Gjoka, 15 vjeçe dhe Enrik Gjoka, 12 vjeç.
Pasi morën ndihmën e parë mjekësore në Spitalin Rajonal të Shkodrës, ata u transportuan me urgjencë në drejtim të Tiranës për mjekim më të specializuar.
Shpërthimi ndodhi të dielën në mëngjes, në katin e parë të ndërtesës ku ndodhej kuzhina e hotelit. Katër anëtarët e familjes Gjoka kanë pësuar djegie në masën 85- 90% të trupit si pasojë e flakëve të zjarrit.
Ndërsa mësohet se më e komplikuar është gjendja shëndetësore e dy më të vegjëlve të familjes. Më e mirë paraqitet gjendja shëndetësore e nënës dhe vajzës së madhe.
