Nënkryetari i Partisë së Lirisë, Endrit Braimllari i bëri apel sot SPAK të hetojë veprimtarinë e kreut të Bashkisë së Kuçovës Kreshnik Hajdari.
Braimllari tha se në Bashkinë e Kuçovës ka ndodhur një masakër e vërtetë elektorale, e cila ka filluar para ditës së zgjedhjeve, ekzekutuar në 14 maj me një ndërhyrje të shtetit, grupeve kriminale, oligarkëve pranë qeverisë dhe është zbatuar në mënyrë perfekte ky plan dhe nga KAS.
Sipas tij, në 1254 raste ka pasur votim në grup dhe qytetarë që kanë votuar nga dy herë; në kutitë e 18 qendrave të votimit, mungojnë procesverbalet origjinale dhe nuk ekziston procesverbali i dorëzimit të materialeve zgjedhore; në 7 qendra votimi nuk kanë qenë në funksion kamerat e sigurisë që shërbejnë për verifikimin e procesit dhe në 2 raste ka rezultuar se është përdorur skema e ‘Trenit Bullgar’.
Braimllari theksoi se dhe pas të gjitha këtyre denoncimeve të bëra publike nuk ka asnjë reagim të prokurorisë apo institucioneve të tjera të cilat me vetëdije të plotë lejuan krimin zgjedhor në Kuçovë.
DEKLARATA E PLOTË
Të nderuar qytetarë jemi në këtë komunikim për të denoncuar për të disatën herë krimin e tmerrshëm shtetëror dhe elektoral të konsumuar në zgjedhjet vendore të 14 majit në Bashkinë e Kuçovës.
Siç është bërë publike nga kandidati i koalicionit ‘Bashkë Fitojmë’, Lefter Maliqi në Bashkinë e Kuçovës ka ndodhur një masakër e vërtetë elektorale, e cila ka filluar para ditës së zgjedhjeve, ekzekutuar në 14 maj me një ndërhyrje të shtetit, grupeve kriminale, oligarkëve pranë qeverisë dhe është zbatuar në mënyrë perfekte ky plan dhe nga KAS.
