Ish- ministri i Drejtësisë, Ylli Manjani shprehet se nuk është faji i të majtëve që drejtohen keq, duke nënvizuar se nuk mund të ndëshkohet e majta pse qeveria e tyre qeveris me koncesion, duke thënë kjo se është teori e praktikë e djathtë. Manjani sqaron në faqen e tij në “Facebook” se qëndrimet e tij kundër qeverisë nuk mund të përbëjnë shkak për ndarjen e së majtës, ndërsa thekson se do të vijojë të mbështesë të majtën e bashkuar. “Cilido që te qëndrimet e mia të drejtpërdrejta sheh arsyen, shkakun apo alibinë e ndarjes së koalicionit të majtë, e ka gabim. Kam qenë, jam e do të jem mbështetës i të majtës së bashkuar.
Nuk është faji i të majtëve që drejtohen keq!”, shkruan Manjani. Më tej në reagimin e tij, Manjani thotë se sot në qeveri kanë ndryshuar vetëm emrat, ndërsa akuzon qeverinë për kanabizimin e vendit dhe braktisjen e të varfërve. “Nuk është fare faji i të majtëve që qeveria nuk i hap telefonin hallexhiut! Nuk kanë asnjë kusur të majtët, kur qeveria shkel ligjet dhe dhunon Kushtetutën! Nuk e ka në edukatën e tij i majti antiligjin! Nuk kanë faj të majtët që qeverisen me të njëjtat metoda si të djathtët! Dallojnë vetëm emrat. Nuk është faji i të majtëve pse vendi kanabizohet. Nuk e bëjnë të majtët vendin hashash! E bën thjesht qeveria e keqe që i shërben trafikut të paligjshëm”, shkruan Manjani në “Facebook”. Sipas tij, nuk është faji i të majtës pse demokracia po rrudhet, liria e shprehjes apo edhe e drejta e pronës shkelet. Sipas tij, e majta shqiptare është zemra e demokracisë, ndërsa “gjen” fajtorin për rrudhjen e demokracisë dhe shkeljen e lirisë së shprehjes dhe të drejtës së pronës.
“Nuk është faji i të majtës se pse demokracia po rrudhet, liria e shprehjes apo edhe e drejta e pronës shkelet”, shkruan Manjani duke nënkuptuar kështu kreun e Partisë Socialiste. Ish- ministri deklaron se nuk kanë faj të majtët pse Edi Rama, themelues i Partisë Demokratike, në krye të PS, dhe Ilir Meta themelues i Partisë Socialiste, por jo më në PS, kanë pikëpamje të ndryshme për drejtimin e shtetit. “Të majtët gjithnjë kanë konkurruar dhe debatuar me njëri-tjetrin! Jam që e majta të bashkohet edhe më shumë, sepse vetëm kështu do largohet e keqja prej nesh, prej qeverisë dhe prej shtetit tonë të përbashkët”, thotë Manjani. Ai e mbyll qëndrimin e tij duke nënvizuar se vazhdon t’i uroj koalicionit “shërim të shpejtë”. Ylli Manjani ka qenë pjesë e Partisë Socialiste deri në vitin 2009, por pas përplasjeve të forta me kreun Edi Rama ai iu bashkua Lëvizjes Socialiste për Integrim në vitin 2011.