Ka ndërruar jetë, motra e vetme e ish-kryeministrit Sali Berisha.
Lajmin e hidhur e bëjnë të ditur në rrjete sociale, miq të familjes Berisha.
Hajrie Ram Osmani – Berisha ishte 6 vjet më e madhe nga Sali Berisha.
Ish-kryeministri Sali berisha ka pasur një konsideratë e respekt të madh për motrën.
“Por në familje ajo ishte mbretëresha dhe nëna që vigjilonte me angazhimin total se mos po ndodh ndryshe dhe ndryshe nuk mund të ndodhte”, ka deklaruar dikur në një emision televiziv, ish-kryeministri Sali Berisha.
Nga ana tjetër edhe motra, Hajria, ndjehej krenare për vëllanë e saj.
Unë jam krenare që jam motra e Sali Berishës
“Unë jam krenare që jam motra e Sali Berishës, qoftë Kryeministër, kryetar i PD-së, President, apo një qytetar i thjeshtë. Për mua ai është dhe mbetet vëllai më i mirë në botë, sepse është i tillë. Një njeri i dashur, i respektuar, që përpiqet të të ndihmojë, por mbi të gjitha ai është i drejtë. Ndaj siç më ka ndodhur që të dëgjoj njerëz që e shajnë, më kanë takuar edhe njerëz që e duan. Madje, kanë ardhur dhe më kanë dhënë dorën duke i uruar që të jetë me sa më shumë jetë, sepse tek ai shohin udhëheqësin e duhur. Por asnjëherë nuk kam ndenjur në të madh se jam motra e tij”.
Hajrie Ram Berisha.
Kodër Kamëz, 26 Gusht 2010
Në familje ajo ishte mbretëresha
Mësimi më i vyer që ju ka dhënë nëna, cili ka qenë?
Mësimi më i vyer, më i çmuari ishte ky: Ne kemi qenë një familje patriarkale qartësisht, por në aparencë në të vërtetë ne ishim një familje matriarkale. Familje në të cilën nëna ishte shumë influente në vendimet dhe vendimi i saj më pozitiv në jetën time ka qenë fakti se ajo më imponoi me kultin e motrës. Po.
“Kulti i motrës”, që do të thotë?
Ne ishim tre fëmijë, 2 vëllezër (Selimi e Salihi) dhe një motër (Hajria). Për çfarë ndodhte në familjen tonë, e para ishte motra në mënyrën më të padiskutueshme.
Mbështetje emocionale e të voglit Berisha…
Motra ishte 6 vjet para meje, ajo bënte gjithçka që të derdhte të gjithë dashurinë mbi mua. Më ka mësuar të lexoj 5 vjeç. Nuk kanë të përshkruar aktet e saj të dashurisë ndaj meje. Por në familje ajo ishte mbretëresha dhe nëna që vigjilonte me angazhimin total se mos po ndodh ndryshe dhe ndryshe nuk mund të ndodhte. Pse më ka shërbyer kjo? Për të më dhënë sensin e barazisë, shumë i domosdoshëm.
