Dështon operacioni i policisë shqiptare, gomonia humbet në ujërat e Malit të Zi

Shqipëria

Dështon operacioni i policisë shqiptare, gomonia humbet në ujërat e Malit të Zi

Më: 5 janar 2018 Në ora: 20:59
Foto ilustrim

Policia e Shtetit reagon zyrtarisht në lidhje me ndjekjen në det të një gomoneje që dyshohet se do të ngarkohej me drogë.

Forcat blu bëjnë me dije se ende nuk është bërë e mundur kapja e saj, ndërsa në operacion janë përfshirë edhe Forcat e Armatosura, italianët, por edhe malazezët.

Sipas policisë vijon kërkimi ndërsa në tokë është gjetur 28 kg kanabis.

Reagimi i policise

Delta Forcë, Policia Kufitare dhe D.V.P.Vlorë gjatë kontrollit nga deti dhe toka në zonën e Karaburunit nisur nga informacionet e marra në rrugë operative se mund të ishte fshehur lëndë narkotike me qëllim trafikimi, rreth orës 13.50, kanë konstatuar një mjet lundrues që lëviste me shpejtësi në drejtim të Mezo-kanalit, Sazan.

Menjëherë në ndjekie të mjetit lundrues janë vënë 3 mjete lundruese të Policisë Kufitare dhe të Delta Forcë. 

Eshtë kërkuar ndihma e anijës "Oriku" dhe e Helikopterit të FA-së.

Gjithashtu është njoftuar GdF Durrës e Vlorë si dhe homologët Italianë.

Menjëherë është ngritur në fluturim një helikopter "COUGAR" i FA-së, i cili ka ndjekur në ujrat neutrale për rreth 1 orë gomonen që lëviste me shpejtësi duke bërë manovra në det me qëllim ti shmangej ndjekies së helikopterit. 

Nga deti vijonte ndjekja nga anija "Oriku" dhe tre mjete lundrues të Policisë Kufitare dhe Delta Forcë.

Në veprim është futur menjëherë edhe GdF-ja në Shqipëri e Itali.

Deri tani nuk është bërë e mundur kapja e gomones, pasi dyshohet se është fshehur në ndonje gji bregdetar, në ujrat territoriale midis Malit të Zi dhe Kroacisë,  por vijon kërkimi nga ajri nga GdF.

Gjithashtu është vënë në ndjekje edhe Policia malazeze.

Nga pamjet filmike të realizuara nga helikopteri i FA në bordin e gomones dallohen tre persona dhe disa bidona plastikë, ndërsa pjesa tjetër e bordit ishte bosh.

Dyshohet se gomonia do merrte lëndën narkotike në Sazan me qëllim trafikimin në drejtim të Italisë.

Nga krehja e zonës në gadishullin e Karaburunit, në vendin e quajtur "Bristan", midis shkëmbinjve, Policia ka gjetur dhe sekuestruar në cilësinë e provës materiale 28 kilogramë lëndë narkotike të ndarë në 5 pako. Policia Kufitare, Delta Forcë dhe Drejtoria Vendore e Policisë Vlorë po vijojnë kontrollet në zonë.

Sot mund të lexoni Shfletoni kopertinat