Ministria e Drejtësisë njofton se ka shkarkuar nga detyra një specialist të hipotekës në Vlorë, pas denoncimeve në emisionin “Stop”. ZQRPP shkarkon dhe procedon penalisht specialistin e ZVRPP Vlorë, Patriot Deraj.
“Menjëherë pas marrjes dijeni, përmes emisionit investigativ “Stop”, për përfshirjen e një punonjësi të ZVRPP Vlorë në afera korruptive, Kryeregjistruesi Elion Semanaj ka firmosur urdhrin e shkarkimit për punonjësin Patriot Deraj, me detyrë specialist IT, pranë kësaj zyre.
Njëkohësisht, ZQRPP ka marrë masa për referimin e materialit kallëzues në organin e prokurorisë.
Ministria e Drejtësisë dhe Zyra Qendrore e Regjistrimit të Pasurive të Paluajtshme janë të vendosur për dënimin e çdo lloj abuzimi me detyrën, shkeljeje të ligjit dhe shpërdorimit të besimit të publikut nga cilido punonjës i Zyrave të Regjistrimit të Pasurisë.
Inkurajojmë qytetarët që të mos hezitojnë të denoncojnë të gjitha veprimet korruptive apo në shkelje të detyrës nga punonjës të ZVRPP-ve apo të institucioneve të tjera në varësi të Ministrisë së Drejtësisë.”, thuhet në njoftimin e Ministrisë së Drejtësisë.
