39 milionë lekë janë akorduar me vendim të Këshillit të Ministrave si fond shtesë për blerjen e automjeteve për prefektët e qarqeve.
12 prefektë të rinj të cilët në të shkuarën kishin shërbyer si ish-ushtarak u prezantuan më 1 nëntor më 12 qarqet e vendit.
Në deklaratat e tij kryeministri Rama ka theksuar rritjen e rolit të prefektëve në qarqe, e mesa duket nuk ka kursyer as buxhetin e shtetit në dobi të tyre.
Vendimi:
NJË SHTESË FONDI NË BUXHETIN E VITIT 2018, MIRATUAR PËR MINISTRINË E BRENDSHME, PËR BLERJE TË AUTOMJETEVE PËR PREFEKTËT E QARQEVE
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.109/2017, “Për buxhetin e vitit 2018”, me propozimin e ministrit të Brendshëm, Këshilli i Ministrave
Vendosi:
Ministrisë së Brendshme, në buxhetin e miratuar për vitin 2018, t’i shtohet fondi prej 39 000 000 (tridhjetë e nëntë milionë) lekësh për blerje të automjeteve për prefektët e qarqeve.
Fondi prej 39 000 000 (tridhjetë e nëntë milionë) lekësh të përballohet nga fondi rezervë i buxhetit të shtetit.
Ngarkohen Ministria e Brendshme dhe Ministria e Financave dhe Ekonomisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
