Lejet e shfrytëzimit për inerte në Lumin Mat janë dhënë në kundërshtim me ligjin, duke krijuar një masakër në basenin e këtij lumin. Në një takim me drejtuesit e kompanive me aktivitet në këtë sektor, prefekti i Lezhës, foli për përgjegjesi penale për këdo që ka abuzuar. Shfrytëzimi i Basenit për inerte është ndaluar, ndërsa të gjitha lejet do të verifikohen.
"Në të gjitha basenet e lumenjve në Shqipëri është bërë nami, ku më shumë, ku më pak. Në basenin e lumit Mat për të cilin unë jam drejtues i Këshillit është bërë kërdia, batërdia".
Por një pjesë e kësaj masakre në basenin e lumit Mat, për të cilën flet prefekti i Lezhës, Gjergj Prendi, është bërë me leje shfrytëzimi të dhëna në kundërshtim me ligjin.
Ndaj në takimin me drejtuesit e kompanive që shfrytëzojnë lumin për Inerte, Prefekti u kujtoi përgjegjësitë penale.
Gjergj Prendi: Nuk janë korrekte, një pjesë janë dhënë në kundërshtim me ligjin. Një pjesë e binzeseve janë vendosur dhe instaluar në shtratin e lumit, në kundërshtim flagrant me ligjin, Kjo përbën vepër të pastër penale.
Ndërsa Drejtorja e Përgjithshme e Inspektoriatit të Ujit, Gerta Lubonja, tha se për të marrë inerte janë shfrytëzuar edhe lejet për reabilitimin e lumit.
Gerta Lubonja: U dhanë disa leje që në fund të fundit pretendonin se ishin rehabilitim por edhe ju të paktën që keni kontrata me to e dini shumë mirë se qëllimi juaj kryesor ka qenë shfrytëzimi i tyre. Për shkak të situatës së krijuar dhe abuzimeve, është vendosur ndalimi i shfrytëzimit të lumit Mat pa patur më parë një studim dhe plan mjedisor, ndërsa po verikohen të gjitha lejet e dhëna.