Rama për gazetën austriake: Evropa është feja jonë

Shqipëria

Rama për gazetën austriake: Evropa është feja jonë

Më: 19 maj 2018 Në ora: 22:17
Edi Rama

Kryeministri i Shqipërisë, Edi Rama vazhdon të jetë protagonist i mediave të huaja sa i përket çështjes së integrimit. Këtë herë, ai ka dhënë një intervistë për gazetën austriake “Kurier”.

I pyetur për komentet e Presidentit francez, Emmanuel Macron, që thotë se BE-ja duhet të reformohet, Rama shprehet se Shqipëria kërkon recetën.

“Evropa duhet të ndryshojë dhe vendet e Ballkanit duhet të ndryshojnë, këtë e kuptoj. Por ajo që kërkojmë ne është një recetë. Çelja e bisedimeve është një recetë për një terapi të re që të shërojë plagët dhe problemet e së shkuarës”.

Rama shprehet se Shqipëria po bën atë që i kërkohet nga Evropa.

“Tani na thonë që duhet të bëjmë më shumë për të luftuar krimin e korrupsionin. A ka mënyrë më të mirë për të bërë këtë se të ndërtosh një sistem drejtësie plotësisht të ri? Në Shqipëri nuk ka qenë problem që të arrestohen njerëzit, por që të dënohen”, është shprehur ai, transmeton “AbcNews”.

Në pyetjen nëse Shqipëria ka një alternativë ndaj BE-së, Rama thotë se njerëzit në Evropë nuk e kanë përjetuar luftën. Ata besojnë se lufta është një film bardhezi në ekran.

“Por ne e kemi përjetuar. Kemi marrë 500 mijë refugjatë, në një vend me 2.5 milionë banorë. E dimë se çfarë është lufta, ndaj Evropa është e rëndësishme për ne. Evropa është feja jonë. Edhe gjatë Perandorisë Osmane, tek ne kishte një shprehje: Dielli ynë lind në Perëndim”.

I pyetur nëse BE-ja mund të pranojë vendet e Ballkanit Perëndimor për të shmangur ndikimin rus, kryeministri shqiptar shprehet se kjo nuk duhet të jetë një dilemë mes më shumë reformave apo më shumë haviar.

“Kjo nuk ka rëndësi, ata mund të na ofrojnë haviar sa të duan. Gjatë 50 viteve komunizëm na është thënë: Qielli është i kuq, jeta do të jetë e mrekullueshme. Progresi është i madh, por ende kemi shumë për të bërë. Tani kemi qiellin blu, na thuhet se jeta do jetë e mrekullueshme, kemi bërë shumë përparim, por mbetet shumë për të bërë. Ne e dimë këtë, por procesi duhet të jetë i drejtë. Ne po presim jashtë derës dhe po trokasim prej vitesh për të hyrë”, u shpreh kryeministri i Shqipërisë, Edi Rama.

commentFirst article
Sot mund të lexoni Shfletoni kopertinat