Jetmir Olldashi është autori i audio-përgjimit të publikuar mes "bashkëpunëtorit X", Albert Veliu dhe vëllait të Ministrit të Brendshëm Fatmir Xhafaj. Ai e pranoi këtë në një konferencë për mediat, ku rrëfeu se një telefonatë nga një burim i tij, e vuri në kontakt me Albert Veliun, të cilit i montoi një pajisje përgjuese për të folur me vëllain e Ministrit. Olldashi tha se pjesa tjetër e materialit audio do të publikohet ditën e hënë.
Jetmir Olldashi, gazetari që intervistoi "bashkëpunëtorin X", Albert Veliu, nëpërmjet një konference për shtyp, pranoi se edhe përgjimin e pretenduar mes tij dhe vëllait të Ministrit Fatmir Xhafaj, e kishte ideuar vetë.
Historia sipas tij fillon pas telefonatës nga një burim i tij, që i kishte bërë me dije një linjë trafiku kanabisi në Vlorë.
Pas largimit nga televizioni dhe emisioni ku punonte, Olldashi tha se u ndje në rrezik për sigurinë e tij dhe të burimit të tij dhe për këtë kontaktoi deputetin Ervin Salianji, të cilit i dorëzoi materialin e përgatitur.
Olldashi theksoi se audio-përgjimi i publikuar është vetëm një pjesë, ndërsa pjesa tjetër do të transmetohet të hënën.
Në fund të konferencës, gazetari Jetmir Olldashi tha se tani që pranoi autorësinë e materialit, ndaj tij do të vërshojnë shpifjet dhe për këtë i kërkoi kolegëve të mos bien pre e kësaj fushate.
Deklarata e plote
Të dashur kolegë gazetarë,
Më lejoni ta nis me prezantimin tim për ata që nuk më njohin, Unë jam Jetmir Olldashi dhe punoj prej 16 vitesh në media si gazetar investigativ.
Pas publikimit ne media te emrit tim per intervisten me Albert Veliun, i njohur ndryshe si deshmitari X, jam sot para jush per t’ju informuar ju dhe përmes jush mbarë opinionin se intervista me deshmitarin x, është pjesë e një investigimi gazetaresk të kryer nga unë mbi drogen dhe trafikantet e droges ne qytetin e Vlores gjatë muajve të fundit!
Historia e ketij investigimi fillon pasi u telefonova nga një burim i cili më tha se donte të më njihte me një person që kishte të dhëna lidhur me trafikun e drogës në qytetin e Vlorës. Burimi më dërgoi një numër telefoni.
E kam telefonuar personin të cilin ju tashmë e njihni me emrin Albert Veliu. Kam dëgjuar rrefimet e tij mbi situatën e drogës në Vlorë, dhe pas disa takimesh vendosa të shkoja në terren.
Njoftova emisionin dhe televizionin në të cilin punoja dhe shkova në Vlorë me Albert Veliun. Gjatë këtij udhëtimi shkuam në lokalin e Agron Xhafajt. Alberti pyeti disa herë stafin e lokalit per të, çka më la të kuptoja se kishte njohje të vjetër, ishte i afert dhe injohur per njerezit aty ne lokal! Agron Xhafaj nuk ishte ne lokal ne ato momente.
Pas kësaj, kur u larguam nga lokali, Albert Veliu telefonoi në praninë time numrin 0672014472 për të cilin më tha se është Agron Xhafaj të cilin e thërriste Pasha. Numrin e verifikova në True Caller dhe rezultoi qe ishte i regjistruar me emrin Goni Xhafaj!
Pas bisedes telefonike Albert Veliu u kthye ne lokal, nderkohe qe unë qëndrova në lokalin përballë. Theksoj se në të gjitha takimet i kisha dhënë një pajisje regjistruese Albert Veliut.
Alberti erdhi menjëherë pas takimit me Agron Xhafaj (Gonin) dhe unë i mora pajisjen e regjistrimit të bisedës që i kisha dhënë.
Nga zbardhja e bisedës së përgjuar që është bërë tashmë edhe publike, Albert Veliu i kishte kërkuar Agron Xhafajt ndihmë për të siguruar dhe trafikuar një sasi kanabisi në drejtim të Italisë dhe Agron Xhafaj e kishte dërguar tek një person për të mbaruar punë.
Më pas shkuam në një lokal i cili sipas Albertit njihej si lokali poshte Habilajve.
Aty erdhi një person, me të cilin u zhvillua një bisedë për të siguruar sasinë e drogës dhe më pas udhëtuam drejt Tragjasit për ta siguruar sasinë e kanabisit.
Nga i gjithë investigimi kam vënë re se pavarësisht raporteve në media se jane goditur grupe kriminale, gjendja në Vlorë ishte jashtë kontrollit dhe të kërkoje kanabis ishte si të kërkoje një produkt normal.
Më pas jemi kthyer në Tiranë.
Në këto kushte duke patur parasysh se flitej për vëllanë e Ministrit të Brendshëm në detyrë, çështja ishte tepër sensitive dhe me shume risk. Vlerësova se siguria fizike e burimit tim dhe e imja ishte në rrezik.
Brenda asaj kohe ndodhi dhe largimi im nga emisioni në të cilin bëja pjesë.
Pas disa kohësh, duke mos patur mundësi transmetimi të materialit, dhe pa asnjë mbështetje në lidhje me këtë investigim që kisha kryer, vendosa të kontaktoj me Partinë Demokratike, për interesin që ky institucion ka patur gjatë gjithë kohës për të denoncuar trafikun e drogës.
Në Partinë Demokratike kontaktova me deputetin Ervin Salianji, një nga deputetët që ka denoncuar trafikun e drogës dhe kanabizimin nga parcelat e hashashit.
E informova në detaje për investigimin dhe rezultatet e tij, si garanci për sigurinë e burimit tim dhe sigurinë time personale.
Për gjithe investigimin e kryer si gazetar kam përgatitur një material.
Një pjesë është transmetuar nga media pas publikimit që bëri Partia Demokratike ditën e hënë. Një pjesë tjetër do të transmetohet këto ditë.
E di që pas kësaj deklarate unë do të jem në epiqendër të presioneve dhe sulmeve të padrejta, për shkak se kjo çështje tashmë është në qendër të debatit publik dhe politik.
Unë i kam bërë ballë këtyre presioneve dhe sulmeve që kanë nisur prej ditësh.
Unë kërkoj mbështetjen e kolegëve dhe qytetarëve të këtij vendi, që besojnë se gazetaria investigative është shërbim i madh për interesin publik.
Ju ftoj ju kolege gazetare ti qëndroni presioneve që do të nisin sapo të largoheni nga kjo zyrë, nga shumë drejtime, për të goditur punën time dhe mua nëpërmjet shpifjeve, fyerjeve dhe të pavërtetave.
Në profesionin tonë të gazetarit, rëndësi ka vetëm e vërteta.
