Partia Demokratike ka denoncuar Policinë Rrugore të Tiranës, e cila i ka vënë gjoba makinave të televizioneve të stacionuara pranë Kryesisë së Kuvendit për të transmetuar live mbledhjen e Komisionit të Medias.
Denoncimi i PD-së
Në një akt të paprecedentë, policia gjobit mediat që transmetojnë direkt komisionet në Kuvendin e Shqipërisë, në përpjekje për të bërë transparencë dhe për të informuar publikun.
Në kohën kur policia po gjobit furgonët e transmetimit, të vendosur në trotuarin poshtë kryesisë së Kuvendit, mediat po transmetonin direkt Komisionin e Arsimit, ku po denoncohej mungesa e dëftesave për 420 mijë nxënësve, si dhe Komisioni i Ekonomisë, ku po faktohej pastrimi i parave të drogës në ekonomi.
Historikisht, mediat kanë transmetuar live nga i njëjti vend me mirëkuptimin e Kuvendit, i cili nuk u ka krijuar kushte televizioneve që të transmetojnë direkt pa u gjobitur me 50 mijë lekë.
PD, duke i bërë thirrje Kuvendit që të krijojë kushtet normale që televizionet të transmetojnë me cilësi dhe të pacensuruar, dënon si banditesk gjobvënien nga Policia për televizionet.
PD beson se gjobvënia ndaj mediave është e qëllimshme, që t’i detyrojë ato të ndërpresin transmetimet nga Kuvendi i Shqipërisë.
PD u bën thirrje mediave të mos heshtin, por të ngrenë zërin dhe të denoncojnë diktatin dhe censurën e çdo forme që përdor qeveria kundër fjalës së lirë.
