Veç krizës së rezultateve, në Kamëz ka probleme edhe mes aksionerëve. Shqetësimi është bërë publik nga vetë presidenti Naim Qarri. Ai zbulon bashkia jo vetëm që nuk ka likuiduar dy rrogat e fundit nga sezoni i shkuar, por këtë vit nuk ka dhënë asnjë qindarkë.
Në një intervistë për “Panorama Sport”, Qarri radhit shkaqet që kanë lënë ekipin në fundin e tabelës. Ai i bën thirrje kryebashkiakut Xhelal Mziu që të japë kontributin e vet si aksioner. Sipas tij, vetëm kështu mund të ringrihet ekipi. Nuk e lë me kaq, pasi në fund jep ultimatum për fitore në Korçë. Dhe nëse nuk ia dalin, masat do të jenë të pashmangshme jo vetëm për trajnerin, por edhe lojtarët.
Pjesë nga intervista
Keni ndërtuar një ekip me emra të mëdhenj dhe lojtarët që e njohin mirë Superioren, por Kamza vazhdon të jetë në fundin e tabelës. Çfarë po ndodh?
Ka disa arsye që është kjo paraqitje në renditje. Ekipi ka zhvilluar lojëra të bukura, por rezultatet nuk kanë ardhur. Sigurisht që kjo gjë më dhemb, sepse nuk duhej të ishte kjo situatë. Prandaj vendosëm që të lëviznim trajnerin që në javët e para, pasi pritshmëritë tona duhej të ishin edhe më të mëdha.
Cilat janë arsyet?
Kjo ka ardhur si rezultat i vonesës që ne patëm gjatë fillimsezonit në merkato. Grupi u plotësua vetëm në ditët e fundit, madje edhe kapiteni Sebino Plaku u afrua në ditën e ndeshjes. Kjo ka pasojat e veta, që janë pasqyruar edhe në rezultatet e arritura. Gjithsesi, unë kam pritur deri në javën e shtatë, pasi e di fort mirë edhe nga përvoja se konsolidimi i një skuadre e kërkon këtë kohë të nevojshme. Prandaj edhe kërkesat ndaj tyre nuk kanë qenë të prera e shtrënguese. Por, tani që janë luajtur 8 takime, nuk ka më kohë. Që nga kjo javë dua rezultatet.
