Brenda dy viteve, ministria e Arsimit parashikon që 98% e nxënësve që mbarojnë arsimin bazë, do të regjistrohen në një format e arsimit të mesëm, pra ose në gjimnaz ose në arsimin profesional.
Ministrja e Arsimit, Sportit dhe Rinisë, Lindita Nikolla gjatë prezantimit të pr/buxhetit të arsimit në komisionin e Edukimit dhe Mjeteve të Informimit Publik, theksoi se arsimi gjithëpërfshirës dhe barazia në sistemin arsimor përbën një tregues të rëndësishëm që mat elementin e braktisjes shkollore.
“Ne parashikojmë edhe pse kemi praktikisht përqindjen më të ulët të braktisjes shkollore në masën 0,57%, ne synojmë që kjo braktisje të shkojë drejt zeros. Brenda 2 viteve parashikojmë që 98% e nxënësve që mbarojnë arsimin bazë do të regjistrohen në një format e arsimit të mesëm ose në arsimin profesional. Aktualisht, 65% do të ndjekin gjimnazin dhe 35% arsimin profesional. Ky është synimi që ne kemi në 2 vitet e ardhshme”, -tha Nikolla. /ATSH