Komiteti Olimpik Ndërkombëtar (IOC) ka lëshuar një paralajmërim tjetër për vendet që refuzojnë të lejojnë sportistët nga kombe të caktuara të konkurrojnë në ngjarjet kryesore për arsye politike.
Në një letër të siguruar nga “Jerusalem Post”, IOC përmendi dy incidente të fundit, anulimin e Kampionatit Botëror të “squashit” për meshkuj në Malajzi pas refuzimit të tyre për t'u dhënë viza sportistëve izraelitë dhe që qeveria serbe e pengoi Kosovën të garojë në Kampionatin Botëror të Boksit në Beograd në tetor dhe nëntor.
IOC kërcënon se do t'i parandalonte këto vende dhe të tjera që shkelin Kartën Olimpike, nga organizimi i ngjarjeve të mëdha nëse vazhdojnë me politikat e tyre.
Organizata tha se do të punonte me Komitetet Olimpike Kombëtare në Malajzi dhe Serbi për të arritur një zgjidhje me qeveritë e tyre, "në rast të dështimit të së cilës vende të tilla, për fat të keq, do ta përjashtonin veten nga e drejta për të pritur ngjarje sportive ndërkombëtare derisa të mund të merren të gjitha garancitë e nevojshme”.
Drejtori sportiv i IOC Kit McConnell dhe James Macleod, drejtori i organizatës për marrëdhëniet e Solidaritetit Olimpik dhe Komitetit Olimpik Kombëtar, u kërkuan të gjitha Federatave Ndërkombëtare që të jenë "jashtëzakonisht vigjilente kur caktojnë dhe organizojnë garat sportive ndërkombëtare" në letër.
Ka pasur me dhjetëra shembuj të vendeve që refuzojnë të japin viza për sportistët nga kombet e tjera për arsye politike, si dhe qeveritë që i drejtojnë konkurrentët e tyre të mos përballen me kundërshtarë nga vende të caktuara.
Shumë prej tyre kanë përfshirë Iranin, por kurrë nuk është sanksionuar apo ndaluar nga IOC.
Federata Ndërkombëtare e Xhudos është i vetmi organ sportiv në Lëvizje që e ka ndaluar Iranin për politikën e tij anti-izraelite.
Kosovës iu refuzua hyrja në Serbi të paktën tre herë për Kampionatin Botëror të Boksit, gjë që u kritikua nga Shoqata Ndërkombëtare e Boksit (FIBA) dhe IOC.
IOC ia hodhi fajin FIBA-s, për dështimin para se t'ia besonte Kampionatin Botëror Serbisë, e cila nuk e njeh Kosovën.
Malajzia dhe Izraeli nuk kanë lidhje diplomatike dhe izraelitëve u ndalohet të vizitojnë vendin, ka shkruar "Insidethegames.biz".
