Numri i turistëve në Himarë u rrit për 20%

Turizëm

Numri i turistëve në Himarë u rrit për 20%

Më: 3 tetor 2018 Në ora: 07:20
Pamje nga Himara

Turizmi në Himarë është rritur me 20% krahasuar me një vit më parë.

Këtë ka pohuar gjatë një prononcimi për ATSH-në, kreu i bashkisë së Himarës, Jorgo Goro.

Duke prezantuar qendrën e informacionit në Himarë, një investim i cili mundëson promovimin e produkteve “South”, Goro bëri të ditur se, Himara ka pësuar një rritje cilësore në Turizëm, teksa shtoi se vitin e ardhshëm do të ketë dyfishin e dhomave që pritën turistët këtë vit. “Këtu jemi në pikën e informacionit turistik në Himarë. Kemi një të ngjashme dhe në Porto Palermo. Në të gjitha pikat gjendet logo “South”. Kjo logo ndodhet në të gjitha pikat turistike dhe po ashtu në të gjitha produktet e zonës së Himarës”, tha Goro.

“Sezoni turistik, sipas informacioneve që kemi marrë nga bizneset është 20% më i madh se vjet. Edhe në numër njerëzish por edhe në xhiro, si edhe me cilësinë e turistëve që kanë ardhur. Këtë vit ajo që ka tërhequr më shumë vëmendjen ka qenë nisja që në prill e vizitorëve dhe që vijon edhe tani, me operatorët e fundit dhe hotelet e fundit që do mbyllen brenda 15 tetorit. Janë gati 300 dhoma të reja që janë hapur këtë vit nga Livadha, duke vijuar në Jalë, e Dhërmi. Pritet që vitin tjetër të jetë dyfishi i këtyre dhomave turistike”, tha Goro.

Zyra e Informacionit Turistik në Himarë, është mbështetur nga program “Zhvillimi i Integruar dhe i Qëndrueshëm i Rajonit Bregdetar Jugor” për të tretin vit radhazi, me synimin që çdo vizitor vendas apo i huaj, të mund të gjejë informacion jo vetëm mbi atraksionet turistike të zonës nëpërmjet broshurave, guidave kulturore për fshatrat, informacion mbi shtigjet, ecje, për biçikletat etj; hartën e zonës dhe vetë bashkinë Himarë, por edhe informacion praktik për një vizitor.

Hapja e zyrës është bërë e mundur pas trajnimit mbi “Planifikimin, Instalimin, Menaxhimin dhe Operimin e Zyrave të Informacionit Turistik [ZIT] /Tourist Information Centre, të punonjësve në departamentin e Turizmit në bashki të ndryshme të Shqipërisë.

commentFirst article
Sot mund të lexoni Shfletoni kopertinat