Debate
Volejbolli si shumë sportet të tjera po kalon sikurse nëpër teh të shpatës sepse shumica e klubeve ballafaqohen me vështirësi financiare. Megjithatë edicioni i ri në Superligën e femrave disa do t’i gjejë shumë mirë të përgatitura e disa të arnuara ashtu si munden. Disa nga klube kërkojnë titullin apo të paktën edhe Kupën, disa të ikin nga fundi i renditjes ose edhe të jenë pjesë e garave përfundimtare. Klubi i volejbollit Kastrioti nga Ferizaj (femrat), si fitues i Kupës ka më së paku telashe nga katër klubet e mëdha, ka një strukturë të lojtareve të reja dhe mjaftë me perspektiv dhe sigurisht se këtë përbërje edhe do ta ruaj për këtë sezon sportiv. Ende nuk është qartë se a do ta vazhdoj karrierën edhe këtë vit lojtarja më me përvojë në Superligë Vildane Jashari. Prezenca e saj ne ekip shton gjasat për titull duke marr parasysh përvojën dhe rolin që luan ne ekip.
Ekipi që ka më së shumti trofe nga paslufta e këndej Prishtina Volley F ( ish Mabetex, pastaj kolegji AAB ) me siguri se do të mundohet ta kthej namin e dikurshëm sepse nga viti 2015 nuk ka fituar asnjë titull si dhe Kupë të Kosovës, por duke u bazuar në strategjinë dhe punën që bënë stafi udhëheqës i skuadrës, priten prurje me elemente të reja.
Edhe ky ekip do të ketë mungesë në rolin e pranueses, rol që shumë vite e kishte Shqipe Kçiku e cila i tha lamtumiren volejbollit si lidere e ekipit dhe kapitene. Kurse përbërja e kësaj skuadre siç po duket në bazë do të jetë me lojtare të njëjta por me synime të qarta. Nga ekipet e tjera vlen të veçohet KV Prishtina Femrat e cila ka bërë një pompozitet të madh në media sa i përket organizimit të klubit pas rikthimit në Superligë. Ekipi është në kërkim te lojtareve të kualitetit te lartë nga shtetet e tjera, si dhe përforcimi eventual me disa lojtare cilësore edhe vendore. Ekipi i Drenasit është në fazë të riorganizimit të skuadrës me lojtare nga ekipet e tjera si dhe e ka të vështirë nëse nga skuadra largohen dy lojtaret më të mira të saj, si Mujaj dhe Kurrumeli që janë në shënjestër të katërshes së madhe të klubeve të Superligës.
Ekipi i Grykës dhe ekipet e tjera kanë paralajmëruar që do të përforcohen me lojtare më të reja nga klubet e tjera të ligës së parë dhe Superligës, si dhe ndonjë lojtare nga Shqipëria. Ekipet e tjera që kanë qenë në fund të tabelës në kampionatin e kaluar kanë telashe të mëdha në ruajtjen e bërthamës së skuadrës, duke marr parasysh se shumë nga lojtaret më të mira të tyre kanë shpreh interesim të gjejnë skuadra të tjera për kampionatin në vijim. Fund
