Dëshmitë e presidentit Hashim Thaçi mund të jenë subjekt i hetimeve të Prokurorisë Speciale të Kosovës.
Thaçi, në cilësinë e dëshmitarit, një ditë më parë, para gjykatës tha se Albin Kurti, Glauk Konjufca dhe Sadri Ramabaja, janë themeluesit e organizatës “Syri i Popullit”, qëllimi i së cilës ishte eliminimi i figurave publike.
Prokurori special Sylë Hoxha, përmes telefonit, ka thënë se po pret procesverbalin e seancës së dëshmisë së presidentit për të parë nëse kjo dëshmi ka bazë të mjaftueshme për hetime.
Por, dëshmia e presidentit nuk i ka bërë shumë përshtypje liderit të Vetëvendosjes, Albin Kurtit.
Kurti, përmes një statusi në rrjetin social Facebook, deklarimet e presidentit i ka quajtur shpifje, derisa ka theksuar se presidenti është në panik.
E, për këto deklarime të presidentit ka reaguar edhe ish-deputeti i Vetëvendosjes, tashmë i Partisë Socialdemokrate, Dardan Molliqaj.
Molliqaj, deklarimet e Thaçit i ka quajtur të ulëta dhe të papranueshme.
Gjatë dëshmisë së tij, një ditë më parë, presidenti e ka cilësuar ndërmarrje vrasëse organizatën “Syri i Popullit”, derisa si rrethanë lehtësuese ai e kishte cilësuar mbylljen e seancës gjyqësore.
Por, kryetarja e trupit gjykues, përmes një urdhri, ndaloi mediat që të xhironin deklaratën e presidentit.