Familja Rugova uron me fjalimin e veçantë të presidentit historik të Kosovës - Bota Sot
Familja Rugova uron me fjalimin e veçantë të presidentit historik të Kosovës

Aktuale

Familja Rugova uron me fjalimin e veçantë të presidentit historik të Kosovës

Nga: A.ZH Më: 31 dhjetor 2018 Në ora: 15:54
Familja e presidentit historik Ibrahim Rugova

Blerta Kllokoqi-Rugova, nuse e djalit të Ibrahim Rugovës, ka publikuar urimin që kishte bërë presidenti historik i Kosovës në vitin 2005, për qytetarët e vendit.

Rugova kishte thënë se viti 2006 do të ishte vit i progresit më të madh të Kosovës dhe i marrëdhënieve të mira me fqinjtë tanë me interes të ndërsjellë, përcjell Bota sot.

“...një Kosovë e pavarur demokratike e integruar në BE, në NATO dhe në miqësi permanente me SHBA, çfarë do të hapte perspektiva të reja për zhvillimin ekonomik dhe do të bënte Kosovën anëtare të kombeve të lira të botës së lire”, kishte deklaruar ndër të tjerash në urimin e tij presidenti Rugova.

Më poshtë postimi i plotë i Blerta Kllokoqi-Rugovës, të cilin e ka shoqëruar me një fotografi aktuale të familjes Rugova:

“Zonja dhe zotërinj,

Viti në të cilin po shkelim do të jetë një vit i progresit më të madh të Kosovës, një vit më efikas, më veprues i institucioneve tona për një zhvillim më të hovshëm ekonomik dhe për një mirëqenie të qëndrueshme për të gjithë qytetarët. 

Njëherësh do të punojmë së bashku... do të bëjmë përpjekje të kultivojmë marrëdhënie të mira me fqinjtë tanë me interes të ndërsjellë.

Në planin e brendshëm do të punojmë më fuqishëm në mbrojtjen dhe integrimin e grupeve etnike apo minoriteteve në shoqërinë dhe në shtetin e Kosovës.

...një Kosovë e pavarur demokratike e integruar në BE, në NATO dhe në miqësi permanente me SHBA, çfarë do të hapte perspektiva të reja për zhvillimin ekonomik dhe do të bënte Kosovën anëtare të kombeve të lira të botës së lirë.

Qytetarë të nderuar,

Në këtë orë gëzimi i kujtojmë me krenari të gjithë ata që ranë për lirinë, pavarësinë dhe demokracinë e Kosovës. Do të bëjmë një angazhim më të madh për ndriçimin e fatit të të zhdukurve.

Zonja dhe zotërinj,

Në këtë natë gëzimi, urime të përzemërta u shprehim Kosovarëve në SHBA dhe në vendet e Europës, që po ndihmojnë progresin e vendit tonë.

Qytetarë të dashur,

Në këtë natë gëzimi t'i bëjmë bashkë dëshirat, vullnetin e mirë dhe veprimet për një Kosovë me prosperuese, më të fortë e më të lumtur.

Me fat Viti i Ri 2006.

Gëzuar.

Zoti Ju bekoftë.

Zoti i bekoftë miqtë e Kosovës.

Zoti e bekoftë Kosovën tonë të çmuar.

Ju falemnderit.”

Presidenti historik Dr. Ibrahim Rugova (30 dhjetor 2005)

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...