Thaçi kërkon reflektim për të përmbyllur ‘konfliktin shekullor’ me Serbinë

Aktuale

Thaçi kërkon reflektim për të përmbyllur ‘konfliktin shekullor’ me Serbinë

Më: 3 janar 2019 Në ora: 16:58
Hashim Thaçi

Presidenti i Kosovës, Hashim Thaçi ka kërkuar reflektim të politikës vendore që të përmbyllet marrëveshja përfundimtare me Serbinë.

Presidenti në profilin e tij në Facebook ka shkruar se njohja reciproke mes Kosovës dhe Serbisë do të niste një proces thelbësor të transformimit të lidershipit dhe modelit qeverisës në vend.

“Derisa po përmbyllim dekadën e dytë të çlirimit, pashmangshëm duhet të reflektojmë për të arriturat, sfidat dhe trashëgiminë që do t’ua lëmë pas fëmijëve tanë. Unë jam shumë krenar për të arriturat tona si gjeneratë. Por, do të ishte e pafalshme, që brezave të rinj t’ua lëmë peng të ardhmen për shkak të akteve populiste dhe mungesës së guximit për të përmbyllur konfliktin shekullor me Serbinë”, ka shkruar Thaçi.

Presidenti beson që pas marrëveshjes mes dy vendeve do të fillojë një epokë e re.

“Besoj shumë që pas marrëveshjes do të fillojë një epokë e re, ku askush më nuk do të mund të pretendonte të fitonte vota në emër të betejës së papërfunduar politike me Serbinë. Kosova ka nevojë për këtë transformim. Për institucione më efektive, qeverisje që në qendër të vëmendjes ka reformat, zhvillimin ekonomik dhe mirëqenien sociale. Këtë ua kemi borxh fëmijëve tanë”, ka përfunduar Thaçi.

commentFirst article
Sot mund të lexoni Shfletoni kopertinat