Kryeredaktori i RTK-së dhe një gazetar kanë marrë urdhra e kërkesa redaktoriale nga zyrtarët e Presidencës. Dëshmitë janë publikuar nga gazetari Nebih Maxhuni. Presidenca dhe RTK’ja kanë heshtur. S’kanë treguar nëse do të merren masa. AGK ka premtuar se do të merret me këtë rast. E një deputet ka thënë se ky rast tregon ndërhyrjen brutale të PDK’së e pushtetit ndaj televizionit publik.
Gazetarët e RTK-së kur shkojnë nëpër konferenca për shtyp nuk bëjnë vetëm pyetje që u jepen prej redaktorëve. Iu ndodh shpesh që pyetjet t’i marrin paraprakisht nga zyrtarët e pushtetit dhe të njëjtat t’ua bëjnë zyrtarëve të Shtetit.
Kështu i ka ndodhur edhe gazetarit Nebih Maxhuni, i cili kishte marrë pyetje prej një Këshilltari të Presidentit Thaçi.
Këshilltari i Presidentit Thaçi, Adil Behramaj ia dërgon pyetjen gazetarit Nebih Maxhuni. Tekstin e njëjtë, gazetarit ia dërgon edhe kryeredaktori Ridvan Berisha, duke shtuar ‘’Mashkell bonja qet pyetje presidentit’’
‘’z. President, nga burime brenda koalicionit qeveritar, kemi mësuar se Qeveria se shpejti pritet ta procedoje ne Kuvendin e Kosoves projektligjin per themelimin e ushtrisë se Kosoves, te cilin ju e aptat iniciuar me herët dhe me pas pezulluar. Çfarë po ndodh me transformimin e FSK-se ne ushtri, a do te themeloher përmes ligjit dhe kur pritet te ndodh kjo? Behramaj i shkruan Maxhunit.
Të njëjtat janë publikuar nga vetë Maxhuni, disa ditë prej kur nuk është më pjesë e këtij mediumi.
I kontaktuar nga Televizioni, Maxhuni ka konfirmuar sërish vërtetësinë e bisedave të publikuara. Ai ka thënë se pas publikimit të tyre, nuk ka pranuar asnjë reagim nga Presidenca as nga RTK-ja.
Në lidhje me këto biseda, Televizioni ka kërkuar sqarim nga Zyra e Presidencës dhe vetë këshilltari Behramaj. Të njëjtit, nuk kanë kthyer asnjë përgjigje për televizionin.
PËR PRESIDENCËN
Në çfarë cilësie i keni shkruar kryeredaktorit të RTK-së dhe gazetarit të RTK-së kur keni kërkuar t’i bëhen pyetje specifike Presidentit të Kosovës, z. Hashim Thaçi?
1. E keni të obliguar nga institucioni t’iu shkruani gazetarëve pyetje të tilla apo këtë e bëni vetëm në raport shoqëror?
2. Nëse s’e keni të përshkruar në detyrat e tuaja në Presidencë që t’iu tregoni gazetarëve se çfarë pyetjesh duhet t’i bëhen Thaçit, atëherë a janë marrë ndonjë masë ndaj jush, qoftë disiplinore, qoftë procedurale për largimin tuaj nga Presidenca?
Edhe menaxhmentit të Lartë të RTK’së, e edhe Bordit të televizionit publik i është kërkuar një përgjigje nga Televizioni Shtatë përgjigje për rastin e përfshirjes së udhëheqësve të mediumit në këto biseda. As bordi e as menaxhmenti nuk janë deklaruar.
PËR RTK’në
1. Pse s’keni reaguar ende dhe s’keni marrë asnjë masë ndaj udhëheqësve të RTK-së që marrin urdhra nga zyrtarë politikë se çfarë pyetjesh duhet t’i bëhen një zyrtari shtetëror?
2. A është praktikë e pranueshme për RTK-në që një Këshilltar i Presidentit i shkruan Kryeredaktorit të RTK-së dhe një gazetari dhe i urdhëron se çfarë pyetjesh duhet t’i bëhen Shefit të Shtetit?
3. Cilat janë masat disiplinore që mund t’i ndërmerrni ndaj udhëheqësve të televizionit që i nënshtrohen urdhrave të zyrtarëve politikë?
Në një përgjigje për televizionin, Asociacioni i Gazetarëve të Kosovës kanë thënë se do të ftojnë në konsultim gazetarin Maxhuni, do të mbledhin bordin dhe pastaj do të vendosin nëse do të reagojnë.
Shefja e AGK’së, Gentiana Begolli, ka premtuar se do të merren me rastin e gazetarit Maxhuni dhe RTK’së.
Edhe Valon Ramadani, deputet në Komisionin Parlamentar për Media, thotë se ky rast vetëm tregon ndërhyrjen brutale të PDK’së e pushtetit në televizionin publik.
Ai ka kërkuar përgjegjësi nga Bordi i RTK’së dhe Zyra e Presidentit për këtë sulm ndaj fjalës së lirë.
