Nesër drejtë Hagës do të udhëtojnë dy komandantët e Ushtrisë Çlirimtare të Kosovës, Sami Lushtaku dhe Rrustem Mustafa.
Lajmin e ka konfirmuar dy ditë më parë avokati Arianit Koci, i cili do të udhëtojë bashkë me ish-komandantin e Zonës së Drenicës dhe atë të Zonës së Llapit.
Koci, i cili udhëton në cilësinë e avokatit mbrojtës, ka theksuar se udhëtimi i tyre do të realizohet përmes linjës së rregullta ajrore, e jo me aeroplan special siç ishte spekuluar në media.
E një ditë para nisjes për Hagë, avokati Koci ka dalë që të ecë rrugëve të Prishtinës me bashkëshorten e tij.
“Gjithsecili e don kohën e vet. Madje, edhe gruaja… Udhëtimit, gjithmonë i paraprinë shetitja në Prishtinë. Ka shumë të meta ky qyteti i jonë, po unë nuk mundem pa të”, ka shkruar ai.
Lushtaku e Mustafa janë dy përfaqësuesit e parë të UÇK-së që do të intervistohen nga prokurorët e Gjykatës Speciale në Hagë.