Shefi i kabinetit të kryeministrit Haradinaj nuk ka konfirmuar lajmin se të parit të ekzekutivit i është refuzuar viza amerikane. Ai i ka thënë medias se deri më tani nuk kanë asgjë zyrtare për këtë temë
Al Jazeera e Ballkanit ka raportuar sot se kryeministrit të Kosovës, Ramush Haradinaj, i është refuzuar viza amerikane për shkak të taksës ndaj Serbisë dhe Bosnjës dhe Hercegovinës.
Një burim i Departamentit amerikan të Shtetit i ka thënë Al Jazeera Balkans se ky sanksion vjen pasi që Haradinaj po refuzon të heqë taksën ndaj Serbisë dhe Bosnjës.
Por, Avni Arifi, shef i stafit të kryeministrit të Kosovës, Ramush Haradinaj, nuk ka konfirmuar lajmin se kreut të ekzekutivit i është refuzuar viza amerikane.
“Deri më tani, nuk kemi asgjë zyrtare për këtë temë”, ka thënë Arifi, në një prononcim, në pasditen e së hënës.
Sipas Al Jazeera Balkans, pasi që Haradinaj nuk mori vizë amerikane, ai nuk do të jetë në gjendje të marrë pjesë në punën e një konference mbi Ballkanin në fillim të shkurtit.
Haradinaj duhej të merrte pjesë në këtë konferencë, dhe mungesa e tij u konfirmua nga një nga organizatorët, ka njoftuar rrjeti televiziv.