Që Projektligji për buxhetin të kalojë, duhen votat e deputetëve të PSD'së, të cilët po e kushtëzojnë votën e tyre me shkarkimin e ministrit Nenad Rikallo.
Që kur është paralajmëruar shkarkimi i tij, ministri i Bujqësisë duket shumë aktiv në punë.
Nenad Rikallo ka mbajtur të martën një takim me përfaqësues të Bankës Botërore.
Por Partia Socialdemokrate kërkon nga kryeministri i vendit, Ramush Haradinaj, ta shkarkojë ministrin serb.
E nëse kjo nuk ndodhë, partia e Shpend Ahmetit nuk do ta votojë buxhetin për vitin 2019.
E, Haradinaj nuk po e merr me nguti këtë kusht. I pari i Qeverisë thotë se do të plotësohet kjo kërkesë.
Ani pse Kryeministri thotë se Rikallo është punë e kryer, ministri duket se nuk i ka dhënë shumë rëndësi këtij ultimatumi.
Në kabinetin e tij i kanë thënë televizionit T7 se Rikallo prej datës gjashtëmbëdhjetë e deri me njëzet e tre do të jetë në pushime dimërore.
Kurse, në bazë të Rregullores së Kuvendit, sesioni pranveror fillon të hënën e tretë të muajit janar, përkatësisht me datën 21 janar.
E, Haradinaj pati thënë se me fillimin e punimeve në kuvend do vijë për votim buxheti në lexim të dytë.
Por, që ky projektligj të kalojë, duhen votat e deputetëve të PSD-së, të cilët po e kushtëzojnë votën e tyre me shkarkimin e Rikallos.
