Këshilltari i kryeministrit Haradinaj, Erolld Belegu ka thënë se Bashkimi Evropian e ka humbur çdo kredibilitet për ndërmjetësim në dialogun Kosovë – Serbi.
Belegu në RTV Dukagjini, ka thënë se është për t’u çuditur se populli e bizneset janë kundër heqjes së taksës e politikanët mbështesin heqjen e taksës.
Këshilltari i kryeministrit ka thënë se pas vendosjes së taksës, është e dukshme se shumë kompani vendore kanë rritur shitjet dhe kanë shtuar numrin e të punësuarve.
Belegu ka thënë se deri më tani nuk ka ndonjë element që Serbia po i plotëson kushtet për largimin e taksës nga ana e Kosovës.
“Nëse dëshiron dikush që taksa të hiqet për t’u bërë pazare me kufijtë, ajo nuk do të hiqet. Taksa është për parandalimin e pazareve me Serbinë. Sepse tash po shihet, pas këtyre dokumenteve që po rrjedhin po të mos ishte taksa ndoshta ky muhabet do të kishte mbaruar. Ky insistim aq i madh se marrëveshja ka qenë gati dhe taksa e ka ndalë këtë marrëveshje, duket se ka pasur diçka. Edhe pse zyrtarisht askush nuk është deklaruar se ka pasur marrëveshje”, tha ndër të tjera Eroll Belegu.
