Kryeministri i Kosovës ka deklaruar se ushtria e Kosovës do të jetë në kufijtë e Kosovës edhe në veri, nëse kufijtë e territorit të Kosovës cënohen.
Ai këtë e ka thënë në Deçan, duke reaguar në deklaratën e presidentit të Serbisë, Aleksandar Vuçiq që serbët në veri do të mbrohen nga Serbia dhe se ka numër të mjaftueshëm të forcave serbe rreth kufirit të Kosovës.
“Nuk po e sulmojmë as veriun e as jugun e vendit tonë, e as që e kërkojmë këtë. Por kushdo që i prek kufijtë e Kosovës, do ta na gjejë neve në kufi. Këtë e dinë të gjithë. Ushtria e Kosovës është ushtri e të gjithë qytetarëve, kështu që veriu dhe serbët në atë rajon asnjëherë nuk do të jenë të rrezikuar”, ka thënë Haradinaj.
Nënkryetari i Qeverisë së Serbisë dhe ministri i Punëve të Brendshme, Nebojsha Stefanoviq i është kundërpërgjigjur Haradinajt, duke i thënë që as mos të mendoj për ndonjë aksion të dhunshëm ndaj serbëve në Kosovë, pasi që sipas tij, Serbia do të dijë se si të përgjigjet.
“Nga kërcënimet e Ramush Haradinajt nuk është frikësuar as presidenti i Serbisë, Aleksandar Vuçiq, e askush nga ne. Po rekomandoj që mos të mendoj për dhunë, e as ndonjë aksion apo ofensivë ndaj serbëve në Kosovë, sepse për këtë do të dimë se si të përgjigjemi”, ka thënë ai për tanjug.
“Është e qartë nervoza e Haradinajt, sepse ka premtuar se do ta rrëzojë Vuçiqin në rrugë qysh para dy muajsh, por kjo megjithatë nuk ka ndodhur”, ka shtuar Stefanoviq.