Kryeministri i Kosovës Ramush Haradinaj thotë të mos ketë qenë në dijeni se kunata e tij Vesa Haradinaj është punësuar në Telekomin e Kosovës si zëvendësdrejtoreshë e Financave.
Megjithatë ai nuk e mohon ndikimin indirekt të punësimit të saj duke qenë se janë në qeverisje. Madje Haradinaj ankohet se kuadro të AAK-së nuk kanë mundur të punësohen tash e 12 vjet.
Haradinaj: Njerëzit e AAK-së nuk kanë mundur të punësohen askund qe 12 vjet
“Ndikim mund të kem pas indirekt, por jo direkt. S’kam qenë në dijeni, fakti që jemi në Qeveri, garant ka ndiku. Me thënë të drejtën një pjese e madhe e kuadrit të Aleancës kanë qenë të privum, s’kanë mujt me gjet vende të punës mbi 12 vite” ,tha Haradinaj.
Kryeministrit i vjen keq që në Kosovë duhet me pas të njohshëm për t’u punësuar. Por apelon te ata që punësohen në çfarëdo mënyre që të shërbejnë mirë aty ku punojnë.
Haradinaj: Më vjen keq që ekziston një situatë e tillë në Kosovë
Më vjen keq që është një situatë e tillë në Kosovë, që për një vend pune duhet me pas ndikime të natyrave çfarëdo qoshin. Ajo që kisha bo apel te kushdo, pa marrë parasysh se si kane ardhë te një vend pune, qe të shërbejnë në pune, t’i ndihmojnë këtij vendi dhe të krijojnë vende pune për të gjithë”, tha Haradinaj.
Ditëve të fundit është raportuar për një valë punësimesh në Telekomin e Kosovës të të afërmve të zyrtarëve të AAK-së.
