Qeveria e Kosovës ka shqyrtuar sot Raportin për të Drejtat e Njeriut në Kosovë për vitin 2018, i publikuar nga Departamenti Amerikan i Shtetit.
Qeveria ka miratuar masat për të adresuar veprimet që dalin nga ky raport për të gjitha institucionet përgjegjëse dhe kompetente, dhe u tha se do të raportohet për veprimet e ndërmarra në çdo dikaster.
Haradinaj: Propozoj një raportim tremujor
“Qëllimi i nxjerrjes për diskutim, sot, është rënie në dakord e gjithë neve për zbatim, që të gjeturat, çfarë janë identifikuar, pra t’i miratojmë si veprime për Qeverinë e vendit, nuk po dua të elaboroj secilin për secilin sektor...Kisha propozuar një raportim në etapa tremujore, për shembull raportimi i ardhshëm lidhur me implementimin dhe zbatimin e këtyre të gjeturave, si veprimi i Qeverisë të ndodhë diku në gjysmën e dytë të muajit qershor, pra çdo tre muaj, më shpesh është e pamundur është zor të sillen rezultate të duhura. Mundemi sot si qeveri këto të gjetura, veprimet që paraqiten t’i miratojmë sot, ndërsa raportimin për veprimet e ndërmarra ta bëjmë çdo tre muaj”, ka thënë Haradinaj.
Në këtë mbledhje po ashtu është miratuar edhe propozim-vendimi për publikimin e veçantë në formë të shtypur në shkrimin brail të legjislacionit të publikuar në gazetën zyrtare, i përzgjedhur pjesërisht me qëllim te ofrimit të qasjes në informim për personat e verbër.
