Botuesi i gazetës kombëtare “Bota sot” Xhevdet Mazrekaj, ka reaguar pas deklaratës skandaloze të ministrit të Infrastrukturës Pal Lekaj, i cili mbrëmë ka kërkuar largimin e ambasadorit të Zvicrës Jean – Humbert Lebet nga Kosova.
Mazrekaj ka thënë se Lekajt po i dhembë shumë e vërteta për “hajninë e shekullit me veteranët e rrejshëm”, e thënë nga ambasadori zviceran, ndaj edhe po kërkon largimin e tij.
Ai në postimin e tij në Facebook, ka theksuar se veteranët e rrejshëm, më së shumti vijnë nga partia e Pal Lekajt, Aleanca për Ardhmërinë e Kosovës.
“Pal Lekaj, është i gatshëm ta dëbojë ambasadorin, shteti i të cilit ka bërë shumë për ndërtimin e Kosovës, vetëm e vetëm që ta mbulojë turpin dhe hajninë e tij dhe të bashkë-partiakëve që janë në Qeveri”, ka shkruar botuesi i “Bota sot”.
Mazrekaj ka treguar poashtu në shenjë hakmarrje ndaj shkrimeve për zhvatjen e 53 milionë eurove nga Ministria e Infrastrukturës, Lekaj nuk po i kryen detyrimet finaciare ndaj gazetës “Bota sot” për marketing.
Postimi i plotë i Mazrekajt:
Ja si hakmerret ministri hajn
Pal Lekaj është tërbuar sa herë që e vërteta i është thënë në sy, e rasti me ambasadorit të Zvicrës nuk mund të bëj diferencën.
Gazeta “Bota sot” është mjaft e zëshme për skandalet që po e përcjellin qeverinë Haradinaj, që nga themelimi i saj. Ndër to, ishte edhe rasti i zhvatjes së 53 milionë eurove që Ministria e Infrastrukturës e drejtuar nga Pal Lekaj, ia fali kompanisë Bechtel Enka?!
E Pali, si Pali, në shenjë hakmarrje ndaj shkrimeve për hajninë e 53 milionëve, nuk po i kryen detyrimet financiare ndaj gazetës “Bota sot” për marketing. Ai po harron se qeveria është e shtetit dhe nuk është pronë private e AAK-së.
Në këtë rast nuk po kryen punë as përmbaruesi i angazhuar qe një kohë të gjatë. Për çudi, në rastet e tjera përmbaruesi ka qenë më efikas.
Pali duhet të tregojë si i kanë ndarë 53 milionët me Bechtel Enkan dhe bashkë partiakët e tij? Çfarë pjese i ka takuar secilit prej tyre?.
Hajnia e shekullit
Pal Lekajt po i dhembë shumë e vërteta për hajnin e shekullit me veteranët e rrejshëm, e thënë nga Ambasadori i Zvicrës, shkëlqesia e tij, Jean – Humbert Lebet. Kjo pasi veteranët e rrejshëm më së shumti vijnë nga partia të cilës i takon ai.
Kur u ndesh me të vërtetën, Pali i nervozua aq shumë dhe “ia tregoi derën”, ambasadorit zviceran.
Pal Lekaj, është i gatshëm ta dëbojë ambasadorin, shteti i të cilit ka bërë shumë për ndërtimin e Kosovës, vetëm e vetëm që ta mbulojë turpin dhe hajninë e tij dhe të bashkë-partiakëve që janë në Qeveri.
Por, Pali tashmë po e ha turpin me bukë.