Një ndër problemet më të cilat po përballet shteti i Kosovës është edhe ikja masive e qytetarëve të saj, drejtë vendeve tjera evropiane dhe më gjerë. Si rezultat i situatës politike dhe ekonomike në vend, atyre po iu pamundësohet qëndrimi në vendlindje.
Një çështje e tillë është diskutuar sot në Kuvend, po që interesim gjeti vetëm tek 15 deputetë dhe tek asnjë ministër i kabinetit qeveritar.
Njohësi i çështjeve politike, Skender Zogaj thotë se ikja e shqiptarëve nga Kosova është gjamë e rëndë, sepse për këtë tokë është derdhur gjaku i rreth 14 mijë bijve dhe bijave më të mira që janë flijuar duke iu kundërvënë okupatorit serb.
“Ikja është gjamë sepse, bëhet fjalë për të njejtit qytetarë që pas luftës, i braktisën të mirat që u ishin ofruar nga vendet e ndryshme të botës dhe erdhën në Kosovë dhe e filluan jetën sipër rrënojave e nën shatore dhe nën strehimore plasmasti, duke pjekur bukën në prushin e ndezur nëpër oborre! Kjo sepse e kishin shpresën se vetëqeverisja do t’ua hapte dhe forconte perspektivën! Por kjo nuk ndodhi, sepse, iku okupatori i huaj dhe vendi e populli ra në kthetrat e strukturave kriminale të cilat e riokupuan Kosovën”, thekson analisti Zogaj.
Ai thotë më tutje se Kosova sot është pronë e 1200 grabitësve dhe 12.000 sejmenëve e rreth 30.000 argatëve të tyre. Kjo e ka ngulfatur jetën dhe e ka zvetnuar shpresën e njerëzve të cilët të vetmen shpresë e shohin te ikja.
“Kjo nuk është ikje nga halli i bukës por është rezultat i shpresës së vrarë! Prandaj, tash nuk ka asnjë mundësi të parandalimit, por ka mundësi të vetëdijësimit për gjendjen e krijuar dhe, më në fund të fillojë të funksionojë shteti ligjor, duke vënë nën pranga nëntokën e krimit dhe armatën e njerëzve me diploma të blera që ua kanë zënë vendet e punës diku rreth 10 mijë të rinjve me shkollim të rregulltë! Ky është hapi i parë që duhet të bëhet nëse dëshirojmë që të ringjallet shpresa e këlutur”, thotë analisti Skender Zogaj për “Bota sot”.
