I vazhdohet mandati Komisionit Hetimor për rastin e turqve të dëbuar - Bota Sot
I vazhdohet mandati Komisionit Hetimor për rastin e turqve të dëbuar

Aktuale

I vazhdohet mandati Komisionit Hetimor për rastin e turqve të dëbuar

Më: 15 prill 2019 Në ora: 12:37
Një studente e shkollës "Mehmet Akif" në Prishtinë gjatë protestave për dëbimin e shtetasve turq, mësimdhënës në këtë shkollë (foto arkivi)

Deputetët e Kuvendit të Kosovës ia zgjatën të hënën mandatin Komisionit Hetimor Parlamentar, i cili merret me rastin e dëbimit të gjashtë shtetasve turq nga Kosova, më 29 mars të vitit të kaluar.

Deputetët, me 60 vota për, një kundër dhe katër abstenime, ia zgjatën mandatin komisionit edhe për 30 ditë.

Anëtarët e Komisionit Hetimor Parlamentar kanë thënë se aktin e dëbimit të gjashtë shtetasve turq nga Kosova e kanë përcjellë shumë shkelje dhe parregullsi, qofshin ligjore, apo të kompetencave.

Komisioni pritet që të dalë me një raport final për këtë çështje.

Dëbimi i gjashtë shtetasve turq, në fundin e marsit të vitit të kaluar, është thënë se është bërë përmes një aksioni të koordinuar ndërmjet shërbimeve të inteligjencës nga Turqia dhe Kosova.

Por, deputetët, presidenti, kryeministri dhe kryetari i Kuvendit të Kosovës kanë thënë se nuk kanë pasur njohuri lidhur me rastin.

Për gjashtë shtetasit turq, Ankaraja dyshon se janë anëtarë të organizatës “Hizmet”, të udhëheqësit fetar turk, Fetullah Gulen. Këtë të fundit, autoritetet turke e fajësojnë për një përpjekje për grushtshtet në Turqi në vitin 2016.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...