Axha i Agon Misinit nga fshati Skifteraj (Gjylekar) i Vitisë, i cili pas kthimit nga Siria u arrestua nga Policia e Kosovës e tani po mbahet në paraburgim si i dyshuar për pjesëmarrje në konflikt të huaj. ka thënë për T7 se nipi i tij nuk ka qenë djalë problematik por është mashtruar nga dikush që ka shkuar në ISIS. Sipas familjarëve, Misini ka qenë moti i interesuar për t’u rikthyer në Kosovë.
Shteti i Kosovës me ndihmën e amerikanëve të premten mbrëma ka riatdhesuar 110 kosovarë që kishin mbetur në zonat e luftës në Siri. Në mesin e tyre janë edhe 4 që ishin pjesë e luftimeve përfshirë edhe Agon Misinin që tani po mbahet në paraburgim.
“Ka shku në Siri gati qe dy vjet. Ai moti ka shku po e patën ndalë kurdët, thojke po du mu kthy se i kam ra pishman. Atje i ka pase dy fëmijë tash i ka këtu në Kosovë, në qendër atje, ka thënë axha i Agon Misinit, Mubarek Misini.
Sipas tij, Agoni është mashtruar nga dikush kur ka shkuar në Siri pa treguar më shumë.
“E kanë mashtru se ka dalë me u shetitë nepër Kosovë, edhe u taku me njerëz ku e di unë”, ka shtuar ai.
Shton se nipi i tij madje ka qëndruar mirë financiarisht.
“E ka pasë punën e mirë s’po e dimë edhe na bash arsyen, arsye sociale s’ka pasë ka punu si moler. Nuk ka qenë predikues i fejës si krejt”, ka potencuar Misini.
Sipas familjarëve Agon Misini po ashtu ka dy fëmijë të cilët tani ndodhen në Vranidoll.
Ligji për ndalimin e bashkimit në konflikte të armatosura jashtë territorit të vendit ka hyrë në fuqi më 2 prill të vitit 2015 dhe ata që marrin pjesë mund të dënohen deri në 15 vjet.
“Kushdo që merr pjesë në ushtrinë ose policinë e huaj, në formacionet e jashtme paraushtarake ose parapolicore, në organizimet grupore apo individualisht , në çfarëdo forme të konflikteve të armatosura jashtë territorit të Republikës së Kosovës, dënohet me burgim prej tre (3) deri në pesëmbëdhjetë (15) vite”.
