Përfaqësuesi i Lëvizjes Vetëvendosje në Komisionin Qendror të Zgjedhjeve Adnan Rrustemi, ka kërkuar nga kandidatët e Listës Serbe për kryetar të komunave të veriut të Kosovës, që të distancohen nga qëndrimet e tyre në letrat e dorëheqjes, për tu bërë certifikimi i tyre nga KQZ.
Rrustemi, ka thënë se ata e kanë cenuar sovranitetin e Kosovës duke iu referuar vendit si “Kosovo i Metohija”.
“Kandidatët e Listës serbe duhet të distancohen publikisht nga qëndrimet në letrat e dorëheqjes, ku cënojnë sovranitetin e Kosovës dhe shkelin Kushtetutën, duke iu referuar Kosovës si “Kosovo i Metohija”. Po ashtu duhet të distancohen nga premtimet se do të tërhiqen menjëherë pas zgjedhjeve dhe se kështu do të veprojnë vazhdimisht”, ka shkruar Rrustemi, në profilin e tij në rrjetin shoqëror “Facebook”.
Më tej ai ka theksuar se vetëm nëse plotësojnë këto kërkesa mund të certifikohen nga ana e KQZ-së.
“Në të kundërtën, ju mbetet me ia kthy borxhin PAN-i ose me u anku në Gjykatë”, tha në fund ai.