Kryetari i Lëvizjes për Bashkim (LB), Valon Murati, ka thënë se letra e dërguar nga Presidenti i Shteteve të Bashkuara të Amerikës (SHBA), Donald Trump nuk duhet të merret si joserioze nga politikanët kosovarë.
Murati ka thënë se letra e dërgua nga Presidenti i SHBA’së, Donald Trump po merret si shaka nga politikanët e Kosovës, madje po shihet si joserioze.
“Ne nuk duhet ta marrim me shaka letrën e Trump-it. Është hera e parë që një president i shkruan letër dy shteteve. Me mbet Kosova kështu siç është, dhe më keq me një asociacion me kompetenca ekzekutive, kjo është shpërbërja e shtetit të Kosovës. Unë e thash alternativën dhe sigurisht nuk ka zgjidhje pa marrëveshje”, ka thënë kryetari i LB-së, Valon Murati.
Sipas tij, ky dialog është i pa alternativë dhe se pengesa siç është taksa e vendosur nga Qeveria e Kosovës ndaj produkteve serbe e boshnjake, do të jetë shtysë që dialogu të rifillojë në një format tjetër.
“Bisedimet Kosovë-Serbi nuk kanë për të përfunduar menjëherë. Mendoj që dialogu është i pa alternativë dhe shumë prej këtyre pengesave, qoftë edhe taksa, do të jenë shtysa që dialogu të rifillojë ndoshta edhe në një format tjetër”, ka thënë ai.