(E plotësuar) - Kryeministri i Kosovës, Ramush Haradinaj, deklaroi se ata që kanë thënë se përmes lëvizjes së kufijve mund të arrihet paqe, e kanë ditur se në atë mënyrë arrihet luftë dhe e kanë bërë qëllimisht.
Sipas tij, ekziston një dyshim i bazuar që presidenti i Kosovës, Hashim Thaçi, kryeministri i Shqipërisë Edi Rama dhe presidenti serb Aleksandër Vuçiq kanë pasur diskutime lidhur me ndarjen e Kosovës.
Shefi i Qeverisë në një tryezë të organizuar nga Instituti Demokratik i Kosovës me temën “Dialogu Kosovë - Serbi pas Samitit të Berlinit, ka thënë se ekziston dyshimi i bazuar që diskutimin e Ramës, Thaçit dhe Vuçiqit e ka udhëhequr shefja për Politikë të Jashtme e Bashkimit Evropian, Federica Mogherini.
Haradinaj: Ata që përmendin lëvizje të kufijve e dinë që arrihet lufta
“Ne nuk kemi interes me hap Kosovën e 17 shkurtit, se këtë Kosovë të 17 shkurtit e ka mbyll Gjykata Ndërkombëtare e Drejtësisë. Nuk ka popull në Ballkan që nuk e ka edhe një hartë tjetër, ne shqiptarët i kemi do harta qysh kishim pas qejf me i pas kufijtë, serbët i kanë do harta qysh kishim pas qejf me pa Ballkanin, por nuk është një popull në Ballkan nuk është një shtet që nuk ka harta. Ju siguroj që kushdo që thotë që përmes lëvizjes së kufijve ose ri-korrigjimit të kufijve arrihet paqe e di që arrihet lufta, arrihen tragjeditë, ata që propozojnë marrëveshje me kufij me qëllim po e bëjnë, me shti Ballkanin në jo stabilitet edhe për minimum dy dekada, ata nuk janë të pavetëdijshëm, ata njerëz nuk janë aq të padijshëm sa mos me ditë që po duan jo stabilitet”, tha ai.
Sipas kryeministrit të Kosovës, ata duhet t’i kërkojnë falje popujve të tyre dhe taksa paguesve të Bashkimit Evropian, që e kanë humbur një vit me një ide të tillë.
Haradinaj: Ekziston dyshimi se diskutimin për kufij e ka udhëhequr Mogherini
“Ekziston një dyshim i bazuar që zoti Vuqiq, zoti Thaçi dhe zoti Rama kanë pasur diskutime lidhur me ndarjen e Kosovës, ekziston ky dyshim i bazuar nuk mund ta konfirmoj, por ekziston ky dyshim i bazuar se kjo është bërë nën udhëheqjen e zonjës Mogherini, shpresoj që tani ata do t’i kërkojnë falje njëri-tjetrit për kohën që ia kanë humbur vetes dhe popujve të vet, edhe BE-së, taksa paguesve të BE-së ja kanë humb mbi një vjet kohë dhe i kanë shkaktuar humbje investimit të BE-së për më shumë Evropë. Fatmirësisht që ndodhi marrëveshja Greqi - Maqedoni e Veriut, se ndryshe Evropa do të ishte shumë humbëse në investimin e vet, kjo ka mund të shkojë edhe më keq”, tha ai.
Haradinaj tha se nuk beson që procesi i Mogherinit do të zgjasë, duke përmendur këtu zgjedhjet në BE që pritet të mbahen në fund të muajit maj. Sipas tij, nuk duhet ndërhyrë në agjendën e atyre që do ta marrin pastaj përsipër këtë proces.
Ai sqaroi se nuk ka asgjë personale me ndërmjetësuesen e dialogut Kosovë-Serbi, veçse tha se e ka kundërshtuar në çështjen e kufijve pasi kjo temë lidhet me fatin e fëmijëve në Kosovë.
Për kufijtë në këtë tryezë ka folur edhe ambasadori i Zvicrës në Kosovë, Jean Hubert Lebet, i cili tha se ndryshimi i tyre nuk është asnjëherë zgjidhje e problemeve.
Lebet: Ndryshimi i kufijve nuk funksionon
“Ndryshimi i kufijve nuk funksionon, nuk ka funksionuar asnjëherë, nuk kemi ndonjë shembull në histori kur i prekni kufijtë që të zgjidhet diçka. Kështu që jemi të lumtur të shohim këtë takim (takimin e Berlinit) që nuk e ka mbështetur këtë. Nëse lëvizni kufijtë nuk zgjidhen të gjitha arsyet e konfliktit, kështu që duhet të punojmë në çështjet të cilat nuk janë zgjidhur dhe këtu në Ballkan nëse filloni t’i prekni kufijtë hyni në telashe, kështu që nuk është një ide e mirë dhe kjo pothuajse është shmangur edhe në takimin e Berlinit dhe shpresojmë që do të largohet përgjithmonë", tha ai.
Tryeza e KDI-së erdhi pas përfundimit të Samitit të Berlinit që u mbajt në fund të muajit të kaluar, ku morën pjesë kryeministrat dhe presidentët e Ballkanit Perëndimor me ftesë të kancelares gjermane Angela Merkel dhe presidentit francez Emmanuel Macron.
Ambasadori zviceran: Nëse filloni t’i prekni kufijtë, hyni në telashe
Ambasadori i Zvicrës në Kosovë, Jean Hubert Lebet, ka thënë se korrigjimi i kufijve asnjëherë nuk ka funksionuar.
Ai madje ka thënë se prekja e kufijve do të sillte telashe për të dyja vendet si Kosovën ashtu edhe Serbinë.
“Ndryshimi i kufijve nuk funksionin, nuk ka funksionuar asnjëherë, jemi të lumtur që takimi i Berlinit nuk e ka mbështetur këtë gjë. Nëse lëvizen kufijtë konfliktet nuk do të zgjidheshin, duhet të punojmë në çështjet që nuk janë zgjidhur. Në Ballkan nëse filloni t’i prekni kufijtë hyni në telashe, dhe kjo nuk është ide e mirë dhe pothuajse kjo është shmangur edhe në takimin e Berlinit shpresojë që do të largohet përgjithmonë”, theksoi Hubert Lebet.
Këto komente ambasadori i bëri gjatë tryezës me temë “Dialogu Kosovë-Serbi pas Samitit të Berlinit” të organizuar nga Instituti Demokratik i Kosovës.
“Samiti i Berlinit ka konfirmuar rëndësinë e palëve që të arrijnë një marrëveshje gjithëpërfshirëse dhe ligjore në mënyrë që të arrihet normalizimi i plotë i marrëdhënieve mes Kosovës dhe Serbisë”, ka thënë Hubert Lebet.
Ambasadori ka shtuar se Zvicra mirëpret iniciativën e Gjermanisë dhe Francës për dialogun Kosovë-Serbi.
“Zvicra mbështet fuqimisht këtë çështje dhe mirëpret iniciativën e Gjermanisë dhe Francës. Takimi pasues i Parisit që fillon në korrik me shpresë do të lejojë që të regjistrojë zhvillimet e para që të fillohet procesi i normalizimit në nivel teknik”, shtoi ambasadori Hubert Lebet.
Ambasadori ka theksuar po ashtu se asnjëherë nuk duhet imponuar ndonjë marrëveshje për sa i përket zgjidhjes së problemit Kosovë-Serbi.
Haradinaj: Përkundër krimeve të kryera në Kosovë, Serbia e kushtëzon dialogun
Kryeministri i vendit, Ramush Haradinaj sot ka marrë pjesë në një tryezë diskutimi e organizuar nga Instituti Demokratik i Kosovës, ku u diskutua për dialogun Kosovë – Serbi.
Haradinaj ka thënë se Kosova është shtëpia e të gjithë neve, edhe e të gjitha partive politike, atyre në pushtet dhe opozitë.
“Mos të harrojmë që ne jemi Evropë, Kosova është Evropë si identitet, unë jam shqiptar qashtu më ka fal Zoti por shteti im tash është Kosova edhe një serb që është i Kosovës ai shtet e ka Kosovën. Unë e dua shumë Shqipërinë edhe e kam si shpi timen por prapë shtet e kam Kosovën. Mendoj se kjo duhet të kuptohet drejt nga të gjithë ata që kanë lindur në Kosovë se shtet e kanë Kosovë. Kjo ka me mbet kështu, është më rëndësi mbi këtë bazë ta ruajmë këtë komunikim. Të gjithë mundemi me pas vërejtje në atdheun tonë, flamuri i Kosovës nuk është i shqiptarëve por i gjithë atyre që jetojnë në Kosovë. Nuk e mohoj Kosovën se e dua flamurin kuq e zi”, ka deklaruar Haradinaj.
Ai ka theksuar se shqiptarët dhe serbët janë fqinjë e kjo s’ka si të ndryshojë.
“Ne jemi fqinjë shqiptarët dhe serbët nuk kemi qysh me e zgjedh s’ka si ndryshon kjo do të jemi këtu gjithherë për njëri-tjetrin, dy fqinj munden me zgjedh a me jetu në paqe a në telashe, e vërteta është se e kaluara është telashe”, ka thënë kryeministri.
Sipas tij, Kosova është e interesuar për paqe në mënyrë që të kalojë në ardhmi edhe pse e kaluara nuk mund të harrohet asnjëherë.
“Unë shkojë në Krushë, e në Mehë e në Suharekë e kudo tjetër, prej këtyre përvjetorëve të masakrave unë shkoj në Berlin pa asnjë kusht për dialog. Të gjithë familjarët e të vrarëve ankohen që nuk e din ku i kanë trupat e tyre. Ne vazhdojmë pa kushte ndërsa serbët na qesin kushte për të dialoguar me Serbinë”, është shprehur i pari i qeverisë.
***
Instituti Demokratik i Kosovës organizon tryezën “Dialogu Kosovë - Serbi pas Samitit të Berlinit”.
