Parada ushtarake e Serbisë që është mbajtur sot në Nish, është udhëhequr nga gjenerali serb, Vladimir Lazareviç, ish-komandant i armatës së tretë që ka vepruar gjatë kohës së ish-Jugosllavisë në Prishtinë.
Lidhur me këtë ka reaguar ashpër shefi i Grupit Parlamentar të LDK-së, Avdullah Hoti. Ai thotë se parada ushtarake e Serbisë është kërcënim për paqen dhe sigurinë në Ballkan.
Sipas Hotit, me këto sjellje politike dhe parada ushtarake, Serbia duket se nuk e ka synim as dialogun me Kosovën, e as hyrjen në BE.
Ja shkrimi i plotë:
Parada ushtarake e Serbisë është kërcënim për paqen dhe sigurinë në Ballkan. Serbia nuk e ka kontrollin demokratik të ushtrisë as nga ana e NATO-s dhe as nga BE, sepse nuk është pjesë e tyre. Ajo vazhdon të bashkëpunoj ngushtë me Rusinë.
Me këto sjellje politike dhe parada ushtarake, Serbia duket se nuk e ka synim as dialogun me Kosovën, e as hyrjen në BE. Përkundrazi, ajo po përafrohet çdo ditë e më shumë me Rusinë. Dhe kjo duhet të merret seriozisht nga shqiptarët në Ballkan, nga BE dhe partnerët tanë në NATO.