Lëvizja Vetëvendosje, qendra në Prishtinë, po sot kur u arrestua Dardan Molliqaj për shkak të protestave të vitit 2015 në mbrojtje të Albin Kurtit, ka bërë thirrje që kryetari i Prishtinës, Shpend Ahmeti, të jap dorëheqje nga pozita e tij, përcjellë "Bota sot".
Askush nga Vetëvendosje, nuk i ka dal në krah sot Dardan Molliqajt, por kjo komunikatë e tyre për komunën e Prishtinës, vulos heshtjen e tyre në këtë rast.
Postim i plotë:
Sot, vizituam vendin ku paradite për shkak të rrëshqitjeve të dheut është rrezikuar jeta e një numri të qytetarëve të kësaj pjese, dhe nxënësve të cilët vijojnë mësimin në shkollën Naim Frashëri. Rrëshqitja e dheut ka ardhur si pasojë e punimeve që po zhvillohen në këtë objekt. Komuna e Prishtinës u mundua që fajin ta hedhë te shpërthimi I një gypi të ujësjellësit. Kjo u demantua nga KRU-Prishtina të cilët pas analizës së marrë nga tereni konstatuan se, po citoj, “ekzekutimi I punëve në gropën ndërtimore të objektit poshtë rrugicës, është bërë në mënyrë joprofesionale, jashtë standardeve për ndërtim dhe mbrojtje të gropës ndërtimore”.
Ky nuk është rasti i parë që po ndodh diçka e tillë. Para disa javësh në po të njëjtën lagje kemi pasur një rast të ngjajshëm dhe poashtu për raste të tilla po raportohet edhe nga lagjet tjera. Lëvizja VETËVENDOSJE!, përmes reagimeve edhe në asamblenë komunale edhe me aktivitete të vazhdueshme kemi ngritur shqetësimin për degradimin e qeverisjes komunale në fushën e ndërtimeve, si për mënyrën si po lëshohen lejet ashtu edhe si po tolerohen ndërtimet pa leje.
Para disa ditësh vetë kryetari i Komunës së Prishtinës deklaroi që nuk mund t’i ndalë ndërtimet e egra, sepse ose e vrasin ose e fusin në burg, e ndërkohë në Prishtinë po vazhdojnë ndërtimet pa leje, e nuk po mbikqyren ato me leje.
Përderisa rastet e fundit ku është rrezikuar jeta e qytetarëve nga ndërtimet kanë të bëjnë kryesisht me rrëshqitje të dheut, kjo lë hapësirë për dyshim që gjtihë ndërtimet po zhvillohen jashtë standardeve dhe duke mos i respektuar lejet e dhëna, duke u bërë rrezik I vazhdueshëm për qytetarët.
Deklaratat e Kryetarit të Komunës, ku si zakonisht mundohen t’ua hedhë fajin tjerëve, janë alibi për mospunën dhe dembelinë e tij dhe në asnjë rast nuk e arsyetojnë çkado që rrezikon qytetarët nga ky degradim i qeverisjes komunale.
Ky kryetar dembel e frikacak, i cili thotë se i rrezikohet jeta e tij, po rrezikon jetëra e qytetarëve të Prishtinës.
Që të shpëtojë jetën e tij dhe të qytetarëve, Shpend Ahemti ka një zgjidhje të lehtë: DORËHEQJEN!
