Sot po mbahet tryeza rreth përfitimeve të Kosovës nga Korniza Investuese për Ballkanin Perëndimor apo WBIF e organizuar nga Instituti EPIK.
Tryeza u hap nga Ministri i Financave, Bedri Hamza, Shefja e Zyrës së BE-së në Kosovës/Përfaqësuesja e Posaçme e BE-së, Nataliya Apostolova dhe Ambasadori i Gjermanisë në Kosovë, Christian Heldt.
Ndërsa fjalimet kyçe për ndikimin e WBIF-it në Kosovës janë bërë nga Menaxheri për Kosovën nga Banka Evropiane e Investimeve, Konstantinos Mastrogiannopoulos, dhe Drejtori i KfW-s për Kosovën, René Eschemann.
Në tryezë u tha që Kosova ka përfituar 19 projekte dhe 31 grante në vlerë prej €110 milion, me investim të vlerësuar në €898 milion për katër sektorë: energjia, mjedisi, sektorë social dhe transporti.
Kjo e bënë Kosovën përfituesin e dytë më të madh të granteve të WBIF-it për kokë banori, në mesin e vendeve të Ballkanit Perëndimor. Kapacitetet e mirëfillta teknike të Ministrisë së Financave për koordinimin dhe negocimin e projekteve infrastrukturore me institucione financiare ndërkombëtare u identifikuan si një nga faktorë kryesorë të suksesit që kontribuan në performancen e mirë të Kosovës në kuadër të WBIF-it.
Si storie suksesi u përmenden:
1. Përmirësimi i Ngrohjes Qendrore në Prishtinë: investim prej 37 milionë EURO që siguroi 24 orë furnizim me ngrohje për qytetarët e Prishtinës, emetimet e CO2 u reduktuan për 73%, ndërsa TERMOKOS-i u bë financiarisht i pavarur, duke rritur faturimin dhe mbledhjen e të hyrave për 570%.
2. Rehabilitimi i Rrugës Hekurudhore X: investim prej 196 milionë EURO që do të rehabilitojë rrjetin hekurudhor prej 148 km dhe do të integrojë hekurudhat e Kosovës në Rrjetin Qendror të Evropës Juglindore dhe Rrjetin e Transportit Trans-Evropian, duke e lidhur kështu efektivisht rrethin hekurudhor të Kosovës me rrjetin hekurudhor të BE-së.
3. Rehabilitimi i rrjetit të furnizimit me ujë dhe rrjetit të ujërave të zeza të Prishtinës: investim prej 55 milionë EURO që siguroi 24 orë furnizim me ujë të pastër për qytetarët e Prishtinës, Fushë Kosovës, Kastriotit, Shtimes, Lipjanit, Besianës dhe Drenasit.