Blerim Latifi, këshilltar i kryeparlamentarit Kadri Veseli, ka reaguar pas dekoratave dhe titujve të nderit që janë ndarë sot nga liderët e institucioneve të Kosovës.
Ai ka thënë se sa më keq që po ecin punët e shtetit, aq më shumë jepemi pas dekoratave dhe titujve të nderit.
Shembull për këtë, Latifi ka marrë edhe liderin autoritarist i Bashkimit Sovietik Leonid Brezhniev, që kishte pasion marrjen e dekoratave dhe titujve nderi.
Postimi i Latifit:
Historianët tregojnë se si Leonid Brezhniev, lideri autoritarist i Bashkimit Sovietik, kishte një pasion gati patologjik për të marrë dekorata dhe tituj nderi! Dhe, sa më shumë thellohej kalbëzimi i shtetit që drejtonte Brezhnievi, aq më shumë shtoheshin dekoratat në krahrorin e tij.
Pak a shumë ngjashëm po veprojmë edhe ne: sa më keq që na ecin punët e shtetit, aq më shumë jepemi pas dekoratave dhe titujve të nderit!
