Pupovci për mosakreditimin e universiteteve: Politizimi i papranueshëm, sidomos ndërhyrja e Qeverisë - Bota Sot
Pupovci për mosakreditimin e universiteteve: Politizimi i papranueshëm, sidomos ndërhyrja e Qeverisë

Aktuale

Pupovci për mosakreditimin e universiteteve: Politizimi i papranueshëm, sidomos ndërhyrja e Qeverisë

Më: 17 korrik 2019 Në ora: 08:39
Dukagjin Pupovci

Këshilli Shtetëror i Cilësisë ditë më parë ka vendosur të mos i akreditojë tri nga universitetet publike, atë të Prizrenit, Pejës dhe të Mitrovicës dhe disa kolegje tjera private.

Ky vendim ka ngjallur shumë reagime në publik. Njohësi i çështjeve arsimore, Dukagjin Pupovci, ka thënë se vendi duhet të mësohet me vendimi të tilla.

“Këshilli Shtetëror i Cilësisë punon në bazë të disa standardeve europiane  dhe mund të ndodh që këto standarde nuk janë plotësuar në mënyrë vigjilente nga këto universitete – sepse këto standarde aplikohen në mënyrë shumë strikte në Europë”, ka thënë Pupovci.

“Universitetet kanë kohë që t’i adresojnë vërejtjet brenda një viti dhe t’i nënshtrohen sërish akreditimi, nëse ndodh e kundërta atëherë mbyllen”.

Pupovci thotë se nëse ekspertët ndërkombëtarë kanë konstatuar se nuk janë plotësuar standardet unike evropiane dhe kanë rekomanduar që këto universitet të mos akreditohen atëherë Këshilli “vetëm duhet ta miratojë një vendim të tillë”.

“Ekspertët janë të aprovuar nga Rrjeti i Evropian i Sigurimit të Cilësisë. Janë 11 kritere të ndryshme që kanë të bëjnë me akreditimin, me siguri ata kanë vlerësuar se ndonjë nga 11 kriteret nuk është plotësuar”.

Pupovci thotë se këto vendime janë profesionale dhe nuk duhet të politizohen.

“Në vendet tjera këto janë vendime profesionale dhe nuk i merr vesh askush tjetër – por te ne kjo situatë është shkaktuar edhe pas disa ndërhyrjeve politike”, ka thënë ai.

“Është politizuar shumë. Disa subjekte po e shohin si rrezik për vota, por edhe nëse kthehemi në të kaluarën – të gjitha këto universitete janë krijuar për vota dhe pa përgatitjen e duhur. Ky lloj politizimi është i papranueshëm – sidomos ndërhyrja e qeverisë”, ka thënë Pupovci.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...